संग्रहित छायाचित्र
संग्रहित छायाचित्र

'शुगरकेन हार्वेस्टर'ला अनुदान देण्यास मंजुरी

पुणे  : राज्यात ऊसतोडणीसाठी वापरल्या जाणाऱ्या ४५ नव्या ''शुगरकेन हार्वेस्टिंग'' खरेदीसाठी अनुदान देण्यास राज्य शासनाने मान्यता दिली आहे. विशेष म्हणजे हा व्यवसाय सुरू करण्यासाठी बहुतेक शेतकरीच आघाडीवर आहेत.

साखर कारखान्यांनी यापूर्वी  केन हार्वेस्टरसाठी २५२ हार्वेस्टरचालकांशी करार केले होते. यंदा ९ लाख हेक्टरवर ऊस लागवड करण्यात आली आहे. जादा उसामुळे तोडीसाठी हार्वेस्टरला मागणी वाढली. त्यामुळे कारखान्यांनी यंदा नव्याने ४५ हार्वेस्टरसाठी करार केले आहेत.

"बहुतेक हार्वेस्टर हे शेतकऱ्यांच्याच मालकीचे आहेत. त्यासाठी या शेतकऱ्यांनी कर्ज काढून प्रतियंत्र एक कोटी रुपयांची गुंतवणूक केली आहे. मोठी गुंतवणूक बघता साखर उद्योग धंद्यात यांत्रिकीकरणाला चालना देण्याचे धोरण स्वीकारले. त्यामुळेच ४० लाख रुपयांपर्यंत अनुदान देण्याचे धोरण सहकार विभागाने स्वीकारले आहे. हार्वेस्टरचा व्यवसाय कोणालाही सुरू करता येत असला, तरी यंत्रमालकाशी साखर कारखान्याने करार केला तरच सरकारी अनुदान मिळते,” अशी माहिती सूत्रांनी दिली.

शेतकऱ्याचा ऊस तोडण्याची जबाबदारी राज्यात कायद्यानुसार साखर कारखान्यांची आहे. त्यामुळे हार्वेस्टर वाढविण्यासाठी कारखाने सतत प्रयत्नशील आहेत. हार्वेस्टरला आधी ऊसतोडणी कामगारांचा विरोध होता. मात्र, अलीकडे हा विरोध कमी झाल्यानंतर शासन आणि कारखान्यांनी हार्वेस्टरला प्रोत्साहन दिले. केन हार्वेस्टरसाठी अनुदान मागणी अर्ज मंजुरीचे अधिकार राज्याचे सहकारमंत्री सुभाष देशमुख यांच्या अध्यक्षतेखालील लाभार्थी निवड समितीला देण्यात आलेले आहेत. अनुदान थेट लाभार्थ्यांच्या कर्जखात्यात डीबीटीने जमा होते.

"ऊसतोडणीत केन हार्वेस्टरच्या माध्यमातून यांत्रिकीकरणाला चालना देणाऱ्या दोनच कंपन्या देशात सध्या कार्यरत आहेत. यात न्यू हॉलंड कंपनीचे ऊसतोडणी यंत्र ९५ लाख रुपये, तर शक्तिमान यंत्र ९२ लाखांच्या आसपास विकले जाते. साखर कारखान्याशी झालेला करार, बॅंक कर्ज प्रस्ताव, यंत्राचे खरेदी बिल, आरटीओ प्रमाणपत्र याबाबी अर्जदाराने सादर करताच अनुदानाचा मार्ग मोकळा होतो," असे सहकार विभागाचे म्हणणे आहे.

पुढील दहा वर्षांत हार्वेस्टरनेच ऊसतोडणी

“उसाची कापणी कारखाने करीत असले तरी सध्या ३५४ रुपये प्रतिटन कापणी खर्च शेतकऱ्यांच्या बिलातून कापून घेतला जातो. यांत्रिकीकरणाचा वेग बघता राज्यात पुढील पाच ते दहा वर्षांत उसाची सर्व कापणी केन हार्वेस्टरने होण्याची शक्यता आहे,” असे मत साखर उद्योग सूत्रांनी व्यक्त केले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com