हरभऱ्याचे क्षेत्र वाढले; ज्वारी, गव्हाचे घटले

औरंगाबाद  : मराठवाड्यात यंदा गतवर्षीच्या तुलनेत रब्बी ज्वारीसह गहू व मक्‍याचे क्षेत्र घटले असून, हरभऱ्याचे क्षेत्र मात्र वाढले आहे. यंदा अपेक्षित पेरणीचा टप्पा ओलांडताना सर्वसाधारण १८ लाख ६ हजार हेक्‍टर क्षेत्राच्या तुलनेत १८ लाख ५७ हजार हेक्‍टरवर रब्बीची पेरणी झाली आहे.

गतवर्षी मराठवाड्यात १८ लाख हेक्‍टरवर रब्बी पेरणी अपेक्षित होती. फेब्रुवारीच्या मध्यान्हातील अहवालानुसार गतवर्षी मराठवाड्यात २० लाख ८९ हजार हेक्‍टरवर, अर्थात ११६ टक्‍के क्षेत्रावर रब्बीची पेरणी झाली होती. यंदा मात्र ११ जानेवारीअखेरच्या अहवालानुसार सर्वसाधारण १८ लाख ६ हजार हेक्‍टरच्या तुलनेत १८ लाख ५७ हजार हेक्‍टरवर, अर्थात अपेक्षेच्या केवळ १०२ टक्‍के क्षेत्रावरच रब्बीची पेरणी झाली आहे.

गतवर्षी मराठवाड्यातील रब्बी ज्वारीची पेरणी ८ लाख १७ हजार हेक्‍टरपुढे गेली होती. ती यंदा ६ लाख २६ हजार हेक्‍टरवरच अडकली आहे. दुसरीकडे गव्हाची गतवर्षी ३ लाख १७ हजार हेक्‍टरवर पेरणी झाली होती. यंदा मात्र गहू २ लाख ५० हजार हेक्‍टरवरच अडकला आहे. गतवर्षी ६७ हजार हेक्‍टरपुढे गेलेली मक्‍याची पेरणीही यंदा ४१ हजार ८०० हेक्‍टरवरच अडकली आहे.

दुसरीकडे गतवर्षी सर्वसाधारण क्षेत्राच्या तुलनेत १९१ टक्‍के क्षेत्रावर, अर्थात ८ लाख २० हजार हेक्‍टरवर असलेले हरभऱ्याचे क्षेत्र यंदा सर्वसाधारण ४ लाख २६ हजार हेक्‍टरच्या तुलनेत ८ लाख ९० हजार हेक्‍टरवर, अर्थात अपेक्षेच्या २०८ टक्‍क्‍यांवर पोचले आहे.

गळीत धान्याचा पेरा घटला

गतवर्षी मराठवाड्यात रब्बी ज्वारी, गहू, मका, इतर तृणधान्यांचा १२ लाख ६ हजार हेक्‍टरवर पेरा झाला होता. यंदा तो ९ लाख ३० हजार हेक्‍टरवर अडकला आहे. हरभरा व इतर रब्बी कडधान्यांचा ८ लाख २० हजार हेक्‍टरवर असलेला पेरा यंदा मात्र जवळपास ७० हजार हेक्‍टरने वाढून ८ लाख ९१ हजार हेक्‍टरवर पोचला आहे. गतवर्षी रब्बी तीळ, करडई, जवस, सूर्यफूल, इतर गळीतधान्य मिळून ६२ हजार ७०० हेक्‍टरवर झालेला पेरा यंदा ३५ हजार ३०० हेक्‍टरवरच अडकला असल्याचे चित्र आहे.