आठ दिवसांनंतर बारामती बाजार समितीत लिलाव

बारामती : हमीभावासंदर्भात शासन घेत असलेल्या कथित फौजदारी व दंडाच्या कारवाईविरोधात भुसार शेतमाल व्यापाऱ्यांनी पुकारलेल्या बंदविरोधात शेतकरी संघटना एकत्र आल्यानंतर पणन संचालक व बाजार समितीनेही व्यापाऱ्यांना सूचना केल्या आणि आज शेतमाल लिलावास पूर्ववत सुरवात झाली.

बारामतीत २६ ऑगस्टपासून अडते असोसिएशनने बेमुदत बंद पुकारला होता. त्यामुळे मागील सोमवार, गुरुवारचे लिलाव झाले नाहीत. दोन दिवसांपूर्वी शेतकरी संघटनांनी बाजार समितीस निवेदन दिले व सोमवारी जर लिलाव पूर्ववत झाले नाहीत, तर व्यापाऱ्यांविरोधात जीवनावश्यक वस्तू कायद्याखाली कारवाई करावी, अशी मागणी केली. गाळे बंद असल्यास आम्ही स्वतः कुलूप तोडू, असा इशारा स्वाभिमानी शेतकरी संघटनेचे जिल्हाध्यक्ष राजेंद्र ढवाण व रघुनाथदादा पाटील शेतकरी संघटनेचे जिल्हाध्यक्ष पांडूरंग रायते यांनी दिला होता.

दरम्यान, पणन संचालकांनीही अशा प्रकारचा कोणताही कायदा अजून अंमलात आलेला नाही किंवा असा निर्णय झालेला नाही, असे स्पष्ट केले. त्यातच शेतकरी संघटनेच्या इशाऱ्यानंतर बाजार समितीनेही गाळे व लिलाव सुरू करावेत, अशी सूचना केली. त्यास प्रतिसाद देत व्यापाऱ्यांनी आज आपले गाळे उघडले. सोमवारी बारामतीत २३७ क्विंटल गुळाची आवक झाली, त्याचा लिलाव करण्यात आला, मात्र बंदबाबत भूमिका स्पष्ट नसल्याने शेतकऱ्यांनी शेतमाल इकडे आणलाच नव्हता. त्यामुळे शेतमालाची मोठी आवक झाली नाही.

दुसरीकडे दुपारी बाजार समितीच्या सभागृहात सहायक निबंधकांच्या उपस्थितीत बैठक झाली. या बैठकीस समितीचे सभापती अनिल हिवरकर, सचिव अरविंद जगताप, संचालक राजेंद्र झारगड, शेतकरी संघटनांचे राजेंद्र ढवाण, पांडुरंग रायते व त्यांचे सहकारी उपस्थित होते. यामध्ये कोणीतरी लांडगा आल्याची बतावणी करेल आणि व्यापारीही लगेच धावत जाऊन शेतकऱ्यांना वेठीस धरतील, तर ते चालणार नाही, असा इशारा संघटनांच्या पदाधिकाऱ्यांनी दिला. यासंदर्भात व्यापाऱ्यांना नोटिसा देण्याची मागणी संघटनेच्या वतीने करण्यात आली.