राष्ट्रीयीकृत बॅंकांची पीककर्ज देण्यास टाळाटाळ ; धुळे, जळगाव जिल्ह्यातील चित्र

जळगाव : धुळे व जळगाव जिल्ह्यांत खरीप पीककर्ज वितरणाची गती अतिशय कमी आहे. संबंधित जिल्ह्यांमधील जिल्हाधिकाऱ्यांनी बॅंकांना नोटिसा बजावून, आदेश देऊनही कार्यवाही व्यवस्थित सुरू नसल्याची स्थिती आहे. यातच राष्ट्रीयीकृत बॅंकांमध्ये पीककर्ज वितरणाबाबत टाळाटाळ केली जात असून, बॅंकांच्या शाखांमध्ये व्यवस्थापकच जागेवर नसतात, असे शेतकऱ्यांचे म्हणणे आहे.

कर्जमाफीचा लाभ घेतलेल्या शेतकऱ्यांना चार महिन्यांपूर्वीच कर्ज फेडीचे दाखले दिले आहेत. परंतु त्यांना नव्याने कर्ज दिलेले नाही. फक्त सर्च रिपोर्ट, कागदपत्रे गोळा करायला सांगितले आहे. त्यासाठी चार ते पाच हजार रुपये खर्च करूनही नवे पीककर्ज मिळत नसल्याने शेतकऱ्यांच्या अडचणी वाढतच आहेत. ग्रामीण भागातील काही बॅंकांनी तर शेतकऱ्यांना जिल्ह्याच्या ठिकाणी जाऊन कृषी शाखेशी संपर्क साधा, अशा सूचना दिल्या आहेत. त्यामुळे शेतकरी हवालदिल झाले आहेत.

 जळगाव जिल्ह्यात सुमारे १ हजार ६०० कोटी रुपये पीककर्ज खरिपात वितरित करायचे आहे. त्यानुसार जिल्हा बॅंक सर्वाधिक कर्ज देणार असून, त्यासाठी गतीने काम सुरू अाहे. या बॅंकेने मोठा लक्ष्यांक गाठला आहे. राष्ट्रीयीकृत बॅंकांनी मात्र २० टक्केही लक्ष्यांक पूर्ण केलेला नाही. धुळे जिल्ह्यात सुमारे ७०० कोटी रुपये खरिपात पीककर्ज वितरणाचा लक्ष्यांक सर्व बॅंकांना दिला आहे.

धुळे-नंदुरबार जिल्हा मध्यवर्ती सहकारी बॅंकेने कामकाज गतीने करण्याचा प्रयत्न केला आहे. सध्या जिल्हा उपनिबंधक कार्यालय व जिल्हा बॅंकेशी संबंधित सोसायट्यांचे सचिव यांचे कर्जमेळावे घेतले जात आहेत. परंतु राष्ट्रीयीकृत बॅंकांनी १० टक्‍केही कर्ज वितरण लक्ष्यांक पूर्ण केलेला नाही. शेतकरी रोज बॅंकेभोवती चकरा मारीत आहेत. गावातून येण्यासाठी त्यांना भाडे खर्च करावे लागते. कामे खोळंबतात. परंतु त्यांची समस्या सुटत नसल्याची स्थिती आहे. नंदुरबार जिल्ह्यातही पीककर्ज वाटप धीम्या गतीने सुरू आहे. या जिल्ह्यात सुमारे ६०० कोटी रुपये कर्ज वितरण अपेक्षित असून, यातून ८० कोटींचे वितरणही राष्ट्रीयीकृत बॅंकांनी केलेले नसल्याचा दावा शेतकऱ्यांनी केला आहे.