बोंड अळीबाबत खानदेश असोसिएशनतर्फे जागृती

जळगाव ः जिल्ह्यात पूर्वहंगामी कापूस लागवड जवळपास आटोपली असून, आगामी हंगामात गुलाबी बोंड अळीचा प्रकोप कापूस पिकावर होऊ नये यासाठी खानदेश जिनिंग प्रेसिंग कारखानदार असोसिएशनतर्फे पुस्तिका व मार्गदर्शन कार्यक्रमांद्वारे जनजागृती केली जात आहे.

मागील महिन्यात असोसिएशनने जागतिक कापूस तज्ज्ञ डॉ. सी. डी. मायी यांच्या मार्गदर्शन कार्यक्रमाचे बोदवड येथे आयोजन केले. त्यात शेतकरी मोठ्या संख्येने सहभागी झाले. आता प्रमुख गावे, शेतीशी संबंधित संस्थांमध्ये बोंड अळीला रोखण्याच्या उपायांबाबत माहिती असलेली पुस्तिका वितरित केली जात आहे. असोसिएशनचे सदस्य, असोसिएशनशी जुळलेले कापूस उत्पादक यांच्या माध्यमातून या पुस्तिका अधिकाधिक कापूस उत्पादकांपर्यंत पोचविण्याचे नियोजन केल्याची माहिती असोसिएशनचे अध्यक्ष प्रदीप जैन यांनी दिली.

खानदेशात कापूस उत्पादक अधिक आहेत. मागील हंगाम गुलाबी बोंड अळीमुळे उद्ध्वस्त झाला. पुढे ही समस्या सोप्या पद्धतीने रोखण्यासाठी कोणत्या उपाययोजना कराव्यात, याची माहिती पुस्तिकेत आहे. त्यात पिकात पाते फुले लागत असतानाच कामगंध सापळे लावणे, एकाच वाणाची लागवड करणे, रेफ्युजची शेताच्या बाहेरच्या भागात कटाक्षाने लागवड करणे आदी मुद्यांचा समावेश आहे. जिल्ह्यात कापूस लागवड अधिक असलेल्या भागावर जनजागृतीसाठी लक्ष केंद्रित करण्यात आले आहे.