मंत्री जानकर यांची दूध दरवाढीत एजंटशिप : बच्चू कडू

कऱ्हाड, जि. सातारा : दुग्ध विकास व पशुसंवर्धनमंत्री महादेव जानकर यांनी दूध दरवाढीत एजंटशिप केली असून शेतकरी कमिशन देणार नसल्यामुळेच शेतकऱ्यांना थेट अनुदान दिले गेले नाही, असा आरोप प्रहार संघटनेचे संस्थापक आमदार बच्चू कडू यांनी केला.

आमदार कडू शुक्रवारी (ता. १३) कऱ्हाड येथील शासकीय विश्रामगृहात आले होते, त्या वेळी त्यांनी पत्रकारांशी संवाद साधला. बळिराजा शेतकरी संघटनेचे अध्यक्ष पंजाबराव पाटील, ‘प्रहार’चे जिल्हाध्यक्ष अजित बानुगडे आदी उपस्थित होते.

या वेळी आमदार कडू म्हणाले, की दूध भुकटीची निर्यात झाल्यास त्यासाठी जास्त दूध खरेदी होईल. तसे झाल्यास दुधाचे दर वाढतील, असे मंत्री जानकर यांचे म्हणणे आहे. तीन रुपये दरवाढीत त्यांची खेळी असून एक रुपया आम्हाला, दोन रुपये तुम्हाला कमिशन ठेवा, हेच दिसते. भुकटीला पैसे देण्यापेक्षा शेतकऱ्यांना प्रती लिटर दुधाचे पैसे द्यावेत किंवा शासनाकडून दुधाळ जनावरांच्या होणाऱ्या सर्व्हेनुसार पैसे द्यावेत, ही मागणी आहे. कंपनी, खासगी कारखाने किंवा संस्थेला दूध भुकटीसाठी अनुदान देण्यापेक्षा शेतकऱ्यांना थेट अनुदान द्यावे, दुधाळ जनावरांना अनुदान द्यावे.