बोंडअळीग्रस्त कपाशीचे पंचनामे सुरू

परभणी : जिल्ह्यात यंदाच्या खरीप हंगामात लागवड केलेल्या १ लाख ९७ हजार ७०९ हेक्टरवरील कपाशीवरील गुलाबी बोंडअळीने आर्थिक नुकसान पातळी ओलांडली आहे. मंगळवार (ता.१२) पर्यंत बोंडअळीग्रस्त शेतकऱ्यांच्या ६४ हजार ८३५ तक्रारी कृषी विभागाकडे प्राप्त झाल्या आहेत. एकीकडे तक्रारींचा ओघ अजून सुरू आहे तर दुसरीकडे शेतावर जाऊन कृषी, महसूल, ग्रामविकास विभागाच्या संयुक्त पथकाकडून पीक नुकसानीचे पंचनामे केले जात आहेत.

शेतकऱ्यांनी केलेल्या नुकसानीच्या दाव्याची ग्राह्यता पडताळता यावी यासाठी नुकसानग्रस्त पिकांचे छायाचित्र जीपीएस सुविधा असलेल्या अॅंगल कॅम मोबाईल अॅपचा वापर करून काढले जात आहे. सर्व्हर डाऊन रहात असल्यामुळे आॅनलाईन छायाचित्र अपलोड करण्यासाठी अडचणी येत आहेत.

त्यामुळे शुक्रवार (ता.१५) पर्यंत पंचनाम्याचे अहवाल जिल्हा प्रशासनास सादर करणे शक्य होणार नाही. यावर्षी परभणी जिल्ह्यामध्ये १ लाख ९७ हजार ७०९ हेक्टर कापूस लागवड झाली आहे.

सद्यस्थितीत यंदा लागवड केलेल्या संपूर्ण क्षेत्रावरील कपाशीवरील गुलाबी बोंडअळीने आर्थिक नुकसान पातळी ओलांडली आहे. मंगळवार (ता.१२) पर्यंत जिल्ह्यातील ६४ हजार ८३४ शेतकऱ्यांनी नुकसानीच्या तक्रारी कृषी विभागाकडे केल्या आहेत. यामध्ये परभणी तालुक्यातील १७ हजार ८२९ शेतकऱ्यांच्या तक्रारी, जिंतूर तालुक्यातील ८ हजार, सेलू तालुक्यातील ९ हजार ६४०, मानवत तालुक्यातील ६ हजार ८२३, पाथरी तालुक्यातील २ हजार २९१, सोनपेठ तालुक्यातील ४ हजार १९१, गंगाखेड तालुक्यातील २ हजार ४२५, पालम तालुक्यातील ९ हजार ६४०, पूर्णा तालुक्यातील ३ हजार ७९० तक्रारीचा समावेश आहे. अजून तक्रारीचा ओघ सुरुच आहे.

पंचनाम्यासाठी मोबाईल अॅप गावातील बोंडअळीग्रस्त शेतकऱ्यांच्या याद्या तयार करून कृषी, महसूल, ग्रामविकास विभागाच्या पथकाकडून शेतकऱ्यांच्या शेतावर जाऊन पंचनामे केले जात आहेत. शेतकऱ्यांने जी नमुन्यातील तक्रार अर्जामध्ये नमूद केलेल्या नुकसानीच्या दाव्याची ग्राह्यतेची पडताळणी करण्यासाठी जीपीएस सुविधा असलेल्या मोबाईल अॅपव्दारे नुकसानग्रस्त पिकांचे छायाचित्र काढावे. सात बारा उताऱ्यावील नोंदीनुसार ३३ टक्के पेक्षा अधिक  नुकसान झालेल्या शेतकऱ्यांना आर्थिक मदत देण्यासाठी प्रस्ताव सादर करावेत असे निर्देश देण्यात आले आहेत.

शुक्रवार (ता.१५) पर्यंत नुकसानाचा अहवाल सादर करण्याचे निर्देश जिल्हा प्रशासनातर्फे देण्यात आले आहेत. परंतु अनेक ठिकाणी मोबाईलची कनेक्टीव्हीटाचा अभाव, सर्वहर डाऊन आदी कारणांमुळे आॅनलाईन छायाचित्र अपलोड करता येत नसल्याचे कर्मचारी सांगत आहेत. तसेच तक्रारीची वाढत चालेली संख्या यामुळे पंचनामे करण्यासाठी मोठा कालावधी लागणार आहे.