कमी मागणी झाल्यानंतर केळी दरात स्थिरता

जळगाव ः दिल्लीमधील धुक्‍याचे वातावरण आणि जम्मूमधील ओखी चक्रीवादळाचा परिणाम जिल्ह्यातील केळी निर्यातीवर झाला आहे. यातच मागील दोन महिन्यांपासून दर ९५० रुपये प्रतिक्विंटलपर्यंत स्थिर आहेत.  जिल्ह्यातील चोपडा व जळगाव, जामनेर तालुक्‍यातच सध्या अधिकची केळी कापणीवर आहे. रावेर, यावल, मुक्ताईनगर, भडगाव भागात कांदेबाग कमी असल्याने निर्यातीवर परिणाम झाला असला तरी दर स्थिर असल्याची माहिती व्यापारी सूत्रांनी दिली आहे. जिल्ह्यात कांदेबाग केळी सध्या कापणीवर आहे. मागील पंधरवड्यापासून जम्मू-काश्‍मिरात ओखी चक्रीवादळामुळे निर्यातीवर परिणाम झाला आहे. जम्मूमधील व्यापाऱ्यांनी मागविलेली केळी आठ ते १० दिवस ट्रकमध्ये अडकून पडत आहे. तसेच दिल्लीतील धुक्‍यामुळे केळी निर्यातीवर परिणाम झाला. सावदा, रावेरातील मोठ्या केळी निर्यातदारांकडून दिल्ली, जम्मू, पंजाब व हरियाना येथे रोज सात ते आठ हजार क्विंटल केळी पाठविली जात होती; पण सध्या ही निर्यात प्रतिदिन दोन ते अडीच हजार क्विंटलवर आल्याची माहिती मिळाली. अशात काही व्यापाऱ्यांनी मुंबईकडील केळीपुरवठा वाढविला आहे. बिगर उतिसंवर्धित रोपांपासून तयार झालेल्या केळीचा मुंबईत अधिकचा पुरवठा होत आहे. उतिसंवर्धित रोपांच्या केळीला २५० रुपये अधिक दर मिळत आहे.  त्यामुळे सध्या उत्तरेकडील राज्यांमध्ये जिल्ह्यातून होणारा केळीचा पुरवठा कमी झाला आहे. तेथील व्यापाऱ्यांनी आयात कमी केली आहे. कांदेबाग केळीला ९५० रुपये दर दोन महिन्यांपासून मिळत आहे, तर जुनारीचे दरही ८०० रुपये प्रतिक्विंटलवर स्थिर आहेत. थंड वातावरणामुळे केळी पक्व होण्याची किंवा तयार होण्याची प्रक्रियाही काहीशी मंदावली आहे. जानेवारीपर्यंत दर स्थिर राहू शकतील, असा अंदाज व्यक्त करण्यात आला.