वाढत्या इंधन दरवाढीच्या निषेधार्थ उद्या बंद

मुंबई : केंद्र व राज्य सरकारच्या धोरणामुळे पेट्रोल, डिझेल व गॅसच्या वाढलेल्या किमतींच्या निषेधार्थ काँग्रेसने सोमवारी (ता. १०) महाराष्ट्र बंद पुकारला आहे. इंधन दरवाढीच्या निषेधार्थ काँग्रेसच्या वतीने देशव्यापी बंद पुकारण्यात आला आहे.

यासंदर्भात प्रदेशाध्यक्ष, खासदार अशोक चव्‍हाण म्हणाले, की देशात पेट्रोल, डिझेल व गॅसच्या किमतींत फार मोठ्या प्रमाणात वाढ झालेली आहे. महाराष्ट्रात पेट्रोल, डिझेल व गॅसच्या किमती या देशामध्ये सर्वात जास्त आहेत. पेट्रोल, डिझेल व गॅसच्या किमतींनी उच्चांक गाठलेला आहे. त्याचप्रमाणे महागाईसुद्धा प्रचंड प्रमाणात वाढलेली आहे. दुर्दैवाची बाब म्हणजे पेट्रोल, डिझेल व गॅसच्या किमती वाढलेल्या असतानासुद्धा केंद्र व राज्य शासन गप्प बसलेले आहे. मे २०१४ नंतर शासनाने पेट्रोलच्या करात २११ टक्के वाढ केली. तसेच डिझेलच्या करात ४४३ टक्के वाढ केलेली आहे.

केंद्र व राज्य शासनाने पेट्रोल, डिझेल व गॅसवर अवास्तव कर लावल्यामुळे त्यांच्या किमती वाढलेल्या आहेत. यामुळे सर्व सामान्य जनता त्रस्त झालेली आहे. केंद्र-राज्य शासनाच्या धोरणाच्या निषेधार्थ महाराष्ट्रातील सर्व जिल्ह्यात काँग्रेस पक्षातर्फे बंद पाळण्यात येणार आहे. तसेच समविचारी धर्मनिरपेक्ष पक्षांनासुद्धा या बंदमध्ये सहभागी होण्यासाठी आम्ही प्रयत्न करीत आहोत, असेही त्यांनी स्पष्ट केले.