भंडारा-गोंदिया लोकसभेचा गड राखण्याचे भाजपसमोर आव्हान

नागपूर  : भंडारा-गोंदिया लोकसभा मतदारसंघाचे खासदार नाना पटोले यांनी भाजपला सोडचिठ्ठी देत खासदारकीचा  राजीनामा दिला. मुख्यमंत्री देवेंद्र फडणवीस यांनी ही पोटनिवडणूक लढवली तर त्यांच्याविरोधात लढण्याचे आव्हानदेखील त्यांनी दिले. पोटनिवडणुकीत गड राखण्याचे आवाहन भाजपसमोर निर्माण झाले आहे.  नाना पटोले यांनी सुरवातीपासूनच मुख्यमंत्री फडणवीस यांच्या कार्यशैलीला टिकेचे लक्ष्य केले. शेतीप्रश्‍नी पंतप्रधान नरेंद्र मोदी व भाजप सरकार गंभीर नसल्याचा आरोप करत ते अनेक शेतकरी आंदोलनांत सहभागी झाले. त्यामध्ये अकोल्यातील यशवंत सिन्हा यांनी केलेल्या आंदोलनाचाही समावेश होता. अकोल्यातील या आंदोलनात नाना एक दिवस सहभागी झाले होते. त्यानंतर ते पक्ष सोडतील हे स्पष्ट झाले. पक्षाला सोडचिठ्ठी देणाऱ्या श्री. पटोले यांनी खासदारकीचा राजीनामा दिला.  भंडारा, गोंदिया लोकसभा मतदारसंघ क्षेत्रात आपली बाजू भक्‍कम करण्याची मोहीम त्यानंतर त्यांनी समर्थकांमार्फत राबविली आहे. ‘नाना के साथ जाना’ अशी घोषणा असलेले फलक या दोन्ही जिल्ह्यांत ठिकठिकाणी झळकू लागले आहेत. त्यातच नानांनी मुख्यमंत्री फडणवीस हे या मतदारसंघात लोकसभेची पोटनिवडणूक लढवतील तर त्यांच्या विरोधात लढू, असे वक्‍तव्य करत भाजपला खुले आव्हानच दिले. त्यामुळे स्थानिक भाजप कार्यकर्त्यांमध्ये रोष वाढीस लागला होता; परंतु या संदर्भाने पक्षाकडून कोणतेच वक्‍तव्य किंवा विरोधासाठी कोणीच पुढे येत नसल्याने त्यांच्यामध्ये अस्वस्थतादेखील निर्माण झाली होती. ही अस्वस्थता ओळखत मुख्यमंत्री फडणवीस यांनी भंडाऱ्याचे पालकमंत्री दीपक सावंत यांचा राजीनामा घेत ऊर्जामंत्री चंद्रशेखर बावनकुळे यांच्याकडे पालकमंत्रिपद सोपविले. गोंदिया जिल्ह्याचे पालकमंत्रिपदी समाजकल्याण मंत्री राजकुमार बडोले आहेत.  कार्यकर्त्यांची घेतली बैठक खासदार नाना पटोले यांनी भाजपसमोर आव्हान उभे केले आहे. त्यामुळे येणारी पोटनिवडणूक चुरशीची होणार असल्याची चिन्हे आहेत. त्यासाठीची तयारी म्हणून मुख्यमंत्री फडणवीस यांच्या उपस्थितीत दोन्ही जिल्ह्यांतील प्रमुख कार्यकर्त्यांची बैठक ‘रामगिरी’वर घेतली. पटोलेंच्या जागी कोण? हाच बैठकीच्या अजेंड्यावरील विषय होता. बाहेरून आयात उमेदवार देऊ नका? अशी मागणी या वेळी कार्यकर्त्यांनी केली. पक्षातीलच योग्य व्यक्‍तीला उमेदवारी द्या, आम्ही सर्व त्याच्या पाठीशी राहू, असा विश्‍वास कार्यकर्त्यांनी मुख्यमंत्र्यांना दिला.