पीककर्ज वाटप करताना बॅंकांनी संवेदनशीलता दाखवावी ः मुख्यमंत्री

मुंबई  : शेतकऱ्यांना पीककर्ज देणे आपले राष्ट्रीय कर्तव्य आहे, याचे भान ठेऊन बँकांनी काम करावे. पीककर्ज वाटप करताना संवेदनशीलता दाखवावी, असे आवाहन मुख्यमंत्री देवेंद्र फडणवीस यांनी केले.

मंत्रालयातील मंत्रिमंडळ सभागृहात बुधवारी (ता. २७) विविध बँकांच्या वरिष्ठ अधिकाऱ्यांची बैठक झाली. त्या वेळी मुख्यमंत्री फडणवीस बोलत होते. या वेळी मुख्यमंत्र्यांनी राज्यातील हायब्रीड ॲन्युईटी रस्त्यांच्या कामांबाबत आढावा घेऊन बँकांच्या समस्यांचे निराकरण केले.

बैठकीस सार्वजनिक बांधकाममंत्री चंद्रकांत पाटील, सार्वजनिक बांधकाम (सार्वजनिक उपक्रम) मंत्री एकनाथ शिंदे, रोजगार हमी योजनामंत्री जयकुमार रावल, सार्वजनिक बांधकाम राज्यमंत्री प्रवीण पोटे-पाटील, स्टेट बँक ऑफ इंडियाचे अध्यक्ष रजनीश कुमार आदी या वेळी उपस्थित होते.

या वेळी मुख्यमंत्री फडणवीस म्हणाले, की राज्यात खरीप हंगामातील पिकांच्या पेरण्या सुरू झाल्या असून, शेतकऱ्यांना बियाणे, खते खरेदी करण्यासाठी अर्थिक सहाय्याची आवश्यकता आहे. त्यासाठी शेतकऱ्यांना पीककर्जाचे वाटप वेळेत झाले पाहिजे. मात्र, बऱ्याच ठिकाणी स्थानिक बँक शाखांकडून या संदर्भात असंवेदनशीलता दाखविली जात आहे. त्यामुळे शेतकऱ्यांचा बँकांवर रोष दिसून येत आहे. त्यामुळे तातडीने सर्व बँकांच्या स्थानिक शाखांपर्यंत पीककर्ज वितरणाबाबत संदेश देण्यात यावेत.

गेल्या महिन्यात झालेल्या राज्यस्तरीय बँकर्स समितीच्या बैठकीमध्ये पीककर्ज देण्यासंदर्भात जो निर्णय झाला आहे, त्याचे पालन सर्वच बँकांनी करणे आवश्यक आहे. शेतकऱ्यांना पीककर्ज देणे हे राष्ट्रीय कर्तव्य आहे याचे भान ठेवून बँकांच्या स्थानिक शाखांनी काम करावे, असे स्पष्ट करीत पेरणीसाठी शेतकऱ्यांना तातडीने कर्जपुरवठा करावा, असे निर्देश मुख्यमंत्र्यांनी या वेळी बँकांच्या वरिष्ठ अधिकाऱ्‍यांना दिले.