पोटनिवडणुकीत भाजपचा पराभव

पोटनिवडणुकीत भाजपचा पराभव
पोटनिवडणुकीत भाजपचा पराभव

लखनौ/पाटणा : उत्तर प्रदेश आणि बिहारमधील तीन लोकसभा पोटनिवडणुकांत सत्ताधारी भारतीय जनता पक्षाला बुधवारी (ता.१४) दारुण पराभवाला सामोरे जावे लागले. केंद्रात आणि उत्तर प्रदेशसह बिहारमध्येही सत्तेत असलेल्या भाजपला हा मोठा धक्का मानला जात आहे. ईशान्येकडील राज्यांतील विजयाचा आनंद या मिनी लोकसभा म्हणून पाहिल्या गेलेल्या निवडणुकीतील अपयशाने हिरावून घेतला गेला. समाजवादी पक्ष आणि बहुजन समाज पार्टीने केलेल्या युतीचा दणका भाजपला बसला. आगामी सार्वत्रिक निवडणुकीपूर्वीच उत्तर प्रदेश आणि बिहारमध्ये लोकसभेच्या तीन, तर विधानसभेच्या दोन जागांसाठी झालेल्या पोटनिवडणुकीत भाजपला मोठा धक्का बसला असून, 'यूपी'त समाजवादी पक्ष, तर बिहारमध्ये लालूंच्या राष्ट्रीय जनता दलाने जोरदार मुसंडी मारत विजयी पताका फडकावली. भाजपला मुख्यमंत्री आणि उपमुख्यमंत्र्यांच्या मतदारसंघांमध्ये पराभवास सामोरे जावे लागले. मागील १९ वर्षांपासून अभेद्य असलेला मुख्यमंत्री योगी आदित्यनाथ यांच्या गोरखपूरच्या गडाला सुरूंग लावण्यात समाजवादी पक्ष आणि बहुजन समाज पक्षाच्या आघाडीला यश आले आहे. येथे "सप'चे उमेदवार प्रवीण निषाद यांनी २१ हजार ८८१ मतांनी भाजपच्या उपेंद्र पटेल यांना पराभूत केले. तर, फूलपूरमध्येही "सप'चे उमेदवार नागेंद्र पटेल हे विजयी झाले असून, त्यांनी भाजपच्या कौशलेंद्र पटेल यांचा ५९ हजार ६१३ मतांनी पराभव केला. मुख्यमंत्री योगी आदित्यनाथ आणि उपमुख्यमंत्री केशवप्रसाद मौर्य यांच्या या दोन जागांसाठी पोटनिवडणूक घ्यावी लागली  होती.

दरम्यान, बिहारमध्ये अररिया येथे लोकसभेसाठी, तर जेहानाबादमध्ये विधानसभेसाठी झालेल्या पोटनिवडणुकीत लालूप्रसाद यादव यांच्या राष्ट्रीय जनता दलास मोठे यश मिळाले, तर भभुआ विधानसभा मतदारसंघ आपल्या ताब्यात ठेवण्यात भाजपला यश आले आहे. मुस्लिमबहुल अररियामध्ये सरफराज आलम हे विजयी झाले आहेत. तस्लिमुद्दीन यांच्या निधनामुळे ही जागा रिक्त झाली होती. सरफराज यांनी भाजपचे उमेदवार प्रदीप सिंह यांना ४५ हजार मतांनी पराभूत केले. जेहानाबाद विधानसभेच्या पोटनिवडणुकीत "राजद'चे उमेदवार कृष्ण मोहन विजयी झाले असून, त्यांनी अभिराम शर्मा यांचा ३५ हजार मतांनी पराभव केला. यामुळे येथून त्यांचेच पूत्र कृष्णमोहन यांना उमेदवारी देण्यात आली होती. भभुआत विधानसभा पोटनिवडणुकीत भाजप नेते दिवंगत आनंदभूषण पांडे यांच्या पत्नी रिंकी पांडे या विजयी झाल्या आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com