आमदार निधीतून दुष्काळग्रस्त भागासाठी सुविधा देणार ः अर्थमंत्री सुधीर मुनगंटीवार

अर्थमंत्री सुधीर मुनगंटीवार
अर्थमंत्री सुधीर मुनगंटीवार

मुंबई  ः दुष्काळग्रस्त भागातील जनतेला आमदार निधीतून सुविधा उपलब्ध करून दिल्या जाणार आहेत. त्यासाठी विशेष बाब म्हणून शासन आदेश काढण्यात येणार असल्याची माहिती अर्थमंत्री सुधीर मुनगंटीवार यांनी दिली. 

आमदार निधीतून दुष्काळग्रस्त भागात पाण्याची टाकी, चारा छावणी, टँकर आदी सुविधा दिल्या जातील.भाजपच्या प्रदेश कार्य समितीची बैठक मंगळवारी (ता. २१) मुंबई येथे पार पडली. या वेळी श्री. मुनगंटीवार यांनी ही माहिती दिली. बैठकीत लोकसभा निवडणुकीचा आढावा घेतानाच राज्यातील दुष्काळी स्थितीवर चर्चा करण्यात आली. 

या वेळी विधानसभा अध्यक्ष हरिभाऊ बागडे, मुख्यमंत्री देवेंद्र फडणवीस, प्रदेशाध्यक्ष रावसाहेब दानवे, शिक्षणमंत्री विनोद तावडे, ग्रामविकासमंत्री पंकजा मुंडे, सहकारमंत्री सुभाष देशमुख, ज्येष्ठ नेते एकनाथ खडसे, प्रदेश संघटनमंत्री विजय पुराणिक, मुंबई अध्यक्ष आशिष शेलार, प्रदेश सरचिटणीस सुजितसिंह ठाकूर, डॉ. रामदास आंबटकर, संजय कुटे आदी उपस्थित होते. दुष्काळग्रस्तांना दिलासा देण्यासाठी भाजपचे सर्व लोकप्रतिनिधी जिल्ह्यातील चारा छावण्यांना भेट देतील आणि भाजपची प्रत्येक जिल्हा शाखा दुष्काळग्रस्त भागात सेवाकार्य करेल, असा निर्णय बैठकीत घेण्यात आला.

पक्षाचे खासदार, आमदार दुष्काळी भागातील चारा छावण्यांना भेट देतील, पाणीटंचाईच्या स्थितीचा आढावा घेतील. सरकारने दुष्काळग्रस्तांच्या मदतीसाठी अनेक निर्णय घेतले असून, त्याच्या अंमलबजावणीचा आढावा लोकप्रतिनिधी घेतील. दुष्काळाचा सामना करणाऱ्या ग्रामस्थांच्या मदतीसाठी आमदार निधीतून पैसे खर्च करण्याची इच्छा अनेकांनी व्यक्त केली आहे. त्यानुसार विशेष बाब म्हणून सरकार शासन आदेश जारी करेल, अशी माहिती मुनगंटीवार यांनी दिली.  या वेळी मुख्यमंत्री देवेंद्र फडणवीस आणि प्रदेशाध्यक्ष रावसाहेब दानवे यांनी मार्गदर्शन केले. दुष्काळग्रस्त जनतेला दिलासा देण्यासाठी संघटनेने प्रभावीपणे काम करावे, अशी सूचना त्यांनी केली. मदत आणि पुनर्वसनमंत्री चंद्रकांत पाटील यांनी दुष्काळी स्थिती आणि त्यावर सरकारने केलेल्या उपाययोजनांची माहिती दिली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com