पुण्यात २२पासून आंतरराष्ट्रीय बोन्साय परिषद

पुणे : भारतामध्ये बोन्साय निर्मिती व कलेचा प्रसार करण्याच्या उद्देशाने २२ ते २५ फेब्रुवारीदरम्यान सिंचननगर येथील कृषी महाविद्यालयाच्या मैदानामध्ये ‘बोन्साय नमस्ते’ या पहिल्या आंतरराष्ट्रीय परिषद आणि प्रदर्शनाचे आयोजन करण्यात येत आहे. या प्रदर्शनामध्ये त्यांच्या एक हजाराहून अधिक बोन्साय कलाकृती मांडण्यात येणार आहे.  पुणे येथील १९८६ पासून बोन्साय कला शिकत असलेल्या प्राजक्ता गिरीधर काळे यांनी सुचेता अवदानी, कामिनी जोहारी, राहुल राठी आणि मार्क डिक्रुज या समविचारी मित्र मैत्रिणींबरोबर ‘बोन्साय नमस्ते’ ही संस्था सुरू केली. शेतीपूरक व्यवसाय म्हणून बोन्सायला ओळख प्रदान करण्याचा ध्यास घेतला आहे. ‘बोन्साय नमस्ते’ या उपक्रमाबद्दल माहिती देताना प्राजक्ता काळे यांनी सांगितले, की बोन्साय निर्मितीचे मूळ भारतात असून, बौद्ध धर्माच्या प्रसारासोबत ‘वामनवृक्ष कला’ परदेशामध्ये गेली. पुढे त्याला जपानने कलेचे स्वरूप दिले. भारतात मात्र ही कला तुलनेने मागे पडत गेली. या कलेला व्यासपीठ देण्यासोबत शेतीपूरक व्यवसाय म्हणून त्यातील संधी पोचवण्याच्या उद्देशाने ‘बोन्साय नमस्ते’ कार्यरत आहे.  पिंपळाच्या पानाच्या आकारात एकूण दहा विभागांमध्ये एक हजाराहून अधिक बोन्साय कलाकृतींचे प्रदर्शन मांडण्यात येईल. त्यात मामे, शोहीन, स्मॉल बोन्साय, मीडियम बोन्साय, लार्ज व एक्स्ट्रा लार्ज बोन्साय यांचा समावेश असेल. येथे १ मीटर उंचीच्या सर्वांत जुन्या १५० वर्षांचे उंबराच्या बोन्सायपासून ३ इंच उंचीचे सर्वांत लहान बोन्साय लोकांना पाहता येईल. प्रदर्शन स्थळी बोन्सायविषयक पुस्तकांचे एक ग्रंथालयही असेल. या वेळी संस्थेचे सल्लागार जनार्दन जाधव यांच्यासह गिरीधर काळे हे देखील उपस्थित होते.

आंतरराष्ट्रीय परिषद 

बोन्साय नमस्ते