दोन्ही काँग्रेसची आज संयुक्त बैठक

मुंबई : केंद्रातील भाजप सरकारच्या विरोधात रणनीती ठरविण्यासाठी दिल्लीत पार पडलेल्या विरोधकांच्या बैठकीनंतर आता राज्यातही काँग्रेस आणि राष्ट्रवादी काँग्रेसच्या नेत्यांनी संयुक्त बैठक आयोजित केली आहे. आज (ता.६) होणाऱ्या या बैठकीत सरकारच्या विरोधात मोट बांधण्याबरोबरच आगामी निवडणुका आघाडी करून लढण्यावर चर्चा करण्यात येणार असल्याचे समजते.  अर्थसंकल्पापूर्वी केंद्र सरकारच्या विरोधात एकत्रित येण्यासंदर्भात चर्चा करण्यासाठी काँग्रेससह सर्वच विरोधी पक्षांच्या प्रमुख नेत्यांची बैठक दिल्लीत पार पडली. त्याच धर्तीवर राज्यातील भाजप सरकारच्या विरोधात आवाज उठविण्यासोबतच आगामी निवडणुकांचा आढावा घेण्यासाठी काँग्रेस आणि राष्ट्रवादी काँग्रेसच्या प्रमुख नेत्यांची बैठक होत आहे. शिवसेना पक्षप्रमुख उद्धव ठाकरे यांनी आगामी निवडणुका स्वबळावर लढण्याची घोषणा केल्याने काँग्रेस आणि राष्ट्रवादीने एकत्र येण्यासाठी जोरदार तयारी सुरू केली आहे. दोन्ही पक्षानी मिळून नुकतीच संविधान बचाव रॅली काढली होती. राष्ट्रवादीचे अध्यक्ष शरद पवार यांनी विरोधी पक्षांना एकत्रित आणण्याचे सूतोवाच केले होते. त्यानुसार पुढची रणनीती ठरविण्यासाठी ही बैठक बोलवण्यात आली आहे. २०१९ च्या लोकसभा आणि विधानसभा निवडणुकीच्या तयारीचा आढावा या बैठकीत घेतला जाईल अशी शक्यता  आहे.