विदर्भात पाच ठिकाणी होणार ब्रिज कम बंधारे

संग्रहित छायाचित्र
संग्रहित छायाचित्र

अमरावती  ः भूजल पुनर्भरणाच्या उद्देशाने स्वयंचलित दरवाजे असलेल्या ब्रिज कम बंधाऱ्यांची निर्मिती केली जाणार आहे. विदर्भ पाटबंधारे विकास महामंडळाने त्याकरिता पुढाकार घेतला असून, पाच ठिकाणी असे बंधारे उभारण्यात येतील.

वर्धा जिल्ह्यातील सारवाडी (ता. कारंजा घाडगे) येथे पाच कोटी रुपये खर्चून अशा प्रकारचा पहिला बंधारा लवकरच पूर्णत्वास जाणार आहे. या बंधाऱ्याच्या कामाचे भूमिपूजन विदर्भ पाटबंधारे विकास महामंडळाचे उपाध्यक्ष तसेच आमदार डॉ. सुनील देशमुख यांच्या हस्ते करण्यात आले. केंद्रीय मंत्री नितीन गडकरी यांच्या संकल्पनेतून ब्रिज तिथे बंधारा ही संकल्पना राबविण्यात येत आहे.

अमरावती ते नागपूर मार्गावर जाम नदीवरील वर्धा जिल्ह्यातील सारवाडी येथे उभारल्या जाणाऱ्या बंधाऱ्याच्या कामाकरिता पाच कोटी रुपयांची तरतूद करण्यात आली आहे. यातून पाच बंधारे बांधले जातील. विदर्भातील तिवसा, देवळी, जामणी, अडदाफाटा, समुद्रपूर या भागात असे एकूण पाच बंधारे बांधले जातील. त्यावर सुमारे २५ कोटी रुपये खर्च होणार आहे. देशात पहिल्यांदाच ब्रिज कम बंधाऱ्यांची संकल्पना विदर्भात राबविली जात आहे.   

दरवाजांची यंत्रणा स्वयंचलित जलसंधारणाच्या पारंपरिक पद्धतीत दरवाजे स्वयंचलित नसल्याने वापराविना खराब होतात किंवा ते हाताळण्यात अडचणीत येतात. मात्र या ब्रिज कम बंधाऱ्यांमध्ये अत्याधुनिक तंत्रज्ञान वापरून दरवाजे हे स्वयंचलित ठेवण्यात आले आहेत. त्यामुळे नदीला आलेल्या पहिल्या दोन पुरामुळे वाहून आलेला गाळ व कचरा निघून जाईल. त्यानंतर त्यामध्ये जलसाठा निर्माण होणार आहे. हा बंधारा बांधताना बंधाऱ्याच्या मागील ५०० मीटर परिसरापर्यंत नदीपात्राचे खोलीकरण व रुंदीकरण केले जाणार आहे. त्यामुळे अंदाजे ५०० एकर क्षेत्राला संरक्षित सिंचनाची सोय होईल.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com