सोलापुरात वांगी, टोमॅटोच्या दरात किरकोळ सुधारणा

सोलापूर ः सोलापूर कृषी उत्पन्न बाजार समितीच्या आवारात गतसप्ताहात टोमॅटो, वांग्याची आवक कमी राहिली. गेल्या काही दिवसांपासून त्यांच्या दरात काहीशी घसरण सुरू होती. पण या सप्ताहात त्यांना मागणी चांगली असल्याने दरात सुधारणा झाली. भाज्यांचे दरही पुन्हा वधारलेलेच राहिल्याचे बाजार समितीच्या सूत्रांकडून सांगण्यात आले.  गतसप्ताहात वांग्याची रोज ३० ते ४० क्विंटल आणि टोमॅटोची २०० ते ३०० क्विंटल इतकी आवक झाली. स्थानिक भागातूनच ही सगळी आवक झाली. गेल्या महिनाभरापासून वांगी, टोमॅटोच्या दरात चांगलीच घसरण होते आहे. या सप्ताहातही काहीशी तशीच स्थिती होती. पण आठवड्याच्या सुरवातीला मागणी एकदम वाढल्याने त्यांच्या दरात काहीशी सुधारणा झाल्याचे दिसून आले. टोमॅटोला प्रतिदहा किलोसाठी २०० ते १००० रुपये आणि वांग्याला ८० ते  १६० रुपये असा दर मिळाला. त्याशिवाय कोथिंबिर, मेथी, शेपू या भाज्यांचे दरही पुन्हा वधारलेलेच राहिले. भाज्याची आवक रोज १० ते १५ हजार पेंढ्यांपर्यंत होती. या सप्ताहात भाज्यांची आवकेत वाढ झालीच, शिवाय मागणीही होती. कोथिंबिरीला शंभरपेंढ्यांसाठी ६०० ते १६०० रुपये, मेथीला ६०० ते ८०० रुपये आणि शेपूला २०० ते ६०० रुपये असा दर मिळाला. पालक, चुका आणि अंबाडीच्या भाज्यांना प्रत्येकी २०० ते ३५० रुपयांपर्यंतर दर मिळला. डाळिंबाचे दर टिकून  गेल्या काही दिवसांपासून डाळिंबाच्या आवकेत काहीशी घट होत आहे. रोज एक ते दीड टनापर्यंत आवक असते. पण या सप्ताहात त्यात सातत्य राहिले नाही, शिवाय आवकही तुलनेने कमीच राहिली. डाळिंबाला प्रतिक्विंटलसाठी ७०० ते ८५०० रुपये असा दर होता. गेल्या काही दिवसांतील त्यांच्या दराचा विचार  करता डाळिंबाचे दर काहीसे टिकून राहिल्याचे दिसून आले.