बुलडाण्यातील पैसेवारी चुकीची : काँग्रेसचा आरोप

बुलडाणा : जिल्ह्यात चुकीच्या पद्धतीने पैसेवारी काढण्यात आली अाहे. खरिपातील सर्वच पिकांची उत्पादकता घटलेली असताना यंत्रणांनी जास्तीची पैसेवारी काढून एक प्रकारे शेतकऱ्यांवर अन्याय केला अाहे. तातडीने ही पैसेवारी रद्द करावी, अशी मागणी काँग्रेसच्या वतीने जिल्हाभर करण्यात अाली. जिल्हास्तरावर, तसेच तालुका तालुक्यात याबाबत प्रशासनाला निवेदने देण्यात अाली अाहेत. शासनाच्या महसूल विभागाने चुकीच्या पद्धतीने पैसेवारी काढल्याचा अारोप या निवेदनात करण्यात अाला अाहे. जिल्ह्यात काही ठिकाणी ५३, तर काही ठिकाणी ६३ पर्यंत पैसेवारी काढण्यात अाली आहे. वास्तिवक या वर्षी संपूर्ण जिल्ह्यात पाऊस झालेला असला तरी त्यात वारंवार खंड होता, तसेच या खंडामुळे पिकांची उत्पादकता थेट घटली. पावसाच्या अनियमितपणामुळे जिल्ह्यातील १३ तालुक्यांतील कापूस, मूग, उडीद, सोयाबीन या प्रमुख पिकांच्या उत्पन्नात घट झाली. त्यामुळे शासनाने शेतकऱ्यांचा माल हेक्‍टरी कमी प्रमाणात खरेदी करण्याच्या सूचना संबंधित विभागास दिल्या आहेत. एकीकडे शासन पिकांची उत्पादकता कमी झाली म्हणून शेतमाल जास्त खरेदी केला जाऊ शकत नाही, असे सांगते तर दुसरीकडे सर्वेक्षणात पैसेवारी ५० पैशांवर दाखवत आहे. शासनाच्या अशा कार्यपद्धतीचा शेतकऱ्यांना फटका बसणार अाहे. सरकारने दबावतंत्राचा वापर करून कृषी विभागाकडून चुकीचा अहवाल मागविल्याची शंका काँग्रेसने घेतली अाहे. दुष्काळाचा लाभ शेतकऱ्यांना मिळू नये म्हणून केंद्र सरकारने दुष्काळ जाहीर करण्याचे निकष व कार्यपद्धती बदलली आहे. सरकारच्या शेतकरीविरोधी निर्णयाचा कॉंग्रेसने निषेध केला. पैसेवारीसाठीचे  अहवाल रद्द करून नवीन व अंतिम पैसेवारी जाहीर करावी. केंद्र, राज्य शासनाने दुष्काळ जाहीर करून वास्तविकता पडताळणी व दुष्काळ जाहीर करावा, अन्यथा जनआंदोलन छेडण्याचा इशारा काँग्रेसकडून देण्यात अाला.