तोडणी कामगारांकडून होतेय हजारो रुपयांची मागणी

कोल्हापूर  : गेल्या वर्षीपेक्षा यंदा ऊसतोडणी कामगार कमी आले आहेत. आधीच गळीत हंगाम धीमा झालेला असतानाच आता ऊस उत्पादकाला खिंडीत पकडण्याचे प्रयत्न तोडणी यंत्रणेकरून सुरू झाले आहे. अनेक तोडणी कामगारांकडून हजारो रुपयांची मागणी उत्पादकांकडे केली जात आहे. कारखान्याकडून पैसे मिळत असतानासुद्धा अशी मागणी केली जात असल्याने उत्पादक हैराण झाले आहेत. कारखान्यांकडूनही या प्रकाराकडे काणाडोळा केला जात असल्याने उत्पादकांतून संतप्त प्रतिक्रिया व्यक्त होत आहेत.

यंदा मजूरटंचाईची जादा झळ करार केलेल्या ऊसतोडणी कामगारापैकी केवळ साठ टक्केच कामगार यंदा दाखल झाले आहेत. यामुळे कारखान्यांचा तोडणी कार्यक्रम पुनर्रचित करावा लागत आहे. चाळीस टक्के कामगारांची उणीव भरून काढताना कारखान्यांना नाकीनऊ येत आहेत. यामुळे ऊसतोडणी खूपच धीम्या गतीने सुुरू आहे. ज्या गावात तीन ते चार ऊसतोडणी कामगारांची टोळी असायची, त्या गावांमध्ये एक किंवा दोन इतक्‍याच प्रमाणात टोळ्या दाखल झाल्या आहेत. साहजिकच याचा ताण कारखान्यांच्या ऊसतोडणी यंत्रणेवर पडत आहे. शेतकऱ्यांना वेळेत तोड देणे शक्‍य होत नसल्याने कारखान्यांचे प्रतिनिधी हवालदिल झाले आहेत. यातच या कामगारांकडून आर्थिक मोबदल्याची मागणी केली जात असल्याने शेतकरी पुरता घायाळ झाला आहे.

अशी केली जाते मागणी तुमच्या उसाला वाडे नाही, ऊस पडलेला आहे, उसात कचरा आहे, उसावर वेल आहे, उसावर मावा आहे, रोगट आहे, अशी अनेक कारणे तोडणी कामगारांकडून उत्पादकांना सांगण्यात येत आहेत. अडचणीतला ऊस असेल तर एकरी पाच पाच हजार रुपये उत्पादकांकडून उकळले जात आहेत. कोणत्याही परिस्थितीत उसाची तोडणी गरजेची असल्याने मुकाटपणे शेतकरी ही रक्कम तोडकऱ्यांना देत आहेत.

कारखाने हतबल अगोदरच मजूर नसल्याने तोडणी कार्यक्रम वेळेत करण्यासाठी कारखाने धावपळ करीत आहेत. यामुळे या कामगारांकडून होणाऱ्या अनाठायी मागण्यांबाबत कारखाने गंभीर नसल्याचे चित्र आहे. परिणामी या खेळात उत्पादकाचीच कोंडी होत आहे.