देवरुखमधील काजू उत्पादकांना लाखोंचा गंडा

रत्नागिरी   ः जादा दराचे आमिष दाखवून एका व्यापाऱ्याने देवरूखमधील निवे बुद्रुक पंचक्रोशीतील आठ ते दहा काजू उत्पादक शेतकऱ्यांना लाखो रुपयांचा गंडा घातल्याचा प्रकार नुकताच उघडकीस आला आहे. या प्रकरणी देवरूख पोलिस निरीक्षकांना निवेदन सादर करण्यात आले आहे.

यंदा उत्पादन कमी असतानाही काजू बी ला म्हणावा तसा दर मिळालेला नाही. अगदी हंगामाच्या सुरवातीपासून आतापर्यंत काजू बीला साधारण ११५ ते १२० रुपये एवढाच दर असून आता तो ११० रुपयांवर स्थिरावला आहे. बागायतदार हवालदिल झाल्याचा फायदा घेत निवे बुद्रूक पंचक्रोशीतील शेतकऱ्यांना एका व्यापाऱ्याने गंडा घातला. हा व्यापारी पंचक्रोशीतील एका गावातील मूळ रहिवासी असून सध्या मात्र परजिल्ह्यात राहतो. या व्यापाऱ्याने फेब्रुवारी महिन्यापासून काजू-बी घेण्याच्या व्यवसायाला सुरवात केली. निवे बुद्रुक व तुळसणी येथे दुकान थाटले होते.

बाजारात दर १२० असतानाही त्याने १५० रुपयाने काजू घेण्यास सुरवात केली. यामुळे मोठे बागायतदार त्याच्याकडे वळले. या ठिकाणी दर चांगला मिळत असल्याचे ऐकून अनेक शेतकरी या व्यापाऱ्याकडे आले. सुरवातीला त्याने सर्व व्यवहार रोखीने केला. त्यामुळे बागायतदार आणि शेतकऱ्यांचा त्याच्यावर विश्‍वास बसला. शेवटच्या टप्प्यात आलेले मोठे उत्पादन पाहून त्याने लाखो रुपयांचा काजू उधारीने खरेदी केला. सुमारे २० ते २५ लाखांची खरेदी करून या व्यापाऱ्याने तेथून पळ काढला आहे. त्याचा मोबाईल बंद असून त्याचा परजिल्ह्यातील पत्ता ठाऊक नसल्याने शेतकरी अडचणीत सापडले आहेत.

या संदर्भात सुनील बेर्डे, सदानंद आगरे, श्रीकांत यादव, शैलेश यादव, पर्शराम घडशी, अनंत कडू, प्रवीण पेडणेकर, विष्णू पेडणेकर या शेतकऱ्यांनी फसवणूक झाल्याबाबत पोलिसांना निवेदन दिले आहे.