राज्यात उद्यापासून टॅबद्वारे पशुगणना

पुणे : गेले वर्षभर टॅब खरेदीमध्ये रखडलेल्या २० व्या पशुगणनेला अखेर मुहूर्त मिळाला आहे. रविवारी (ता. ३०) परळी येथे महिला व बालविकासमंत्री पंकजा मुंडे यांच्या हस्ते टॅबद्वारे हाेणाऱ्या पशुगणनेस प्रारंभ हाेणार आहे. ही पशुगणना डिसेंबरअखेरपर्यंत सुरू राहणार असून, विविध १५ पशूंच्या गणनेबराेबर कुक्कुट आणि मस्त्य व्यवसायाची देखील गणना करण्यात येणार आहे, अशी माहिती पशुसंवर्धनमंत्री महादेव जानकर यांनी दिली.

येथे शुक्रवारी (ता. २८) आयोजित पत्रकार परिषदेत श्री. जानकर यांनी ही माहिती दिली. या वेळी पशुंसवर्धन आयुक्त कांतिलाल उमाप, अतिरिक्त आयुक्त डॉ. डी. एम. चव्हाण उपस्थित हाेते. पशुगणनेतून विविध पशुधनाची अचूक आकडेवारी उपलब्ध व्हावी यासाठी टॅबद्वारे पशुगणना करण्याचा निर्णय केंद्र शासनाने घेतला. यासाठीच्या टॅबचा निम्मा खर्च केंद्र शासन करणार आहे. मात्र, टॅब खरेदीसाठी तांत्रिक बाबींमुळे झालेल्या विलंबामुळे २० वी पशुगणना एक वर्ष रखडली हाेती. अखेर या गणनेला मुहूर्त मिळाला आहे.

पशुगणनेसाठी ७१२६ टॅब खरेदी करण्यात आले असून, प्रत्येक गावात, वॉर्डात घराेघरी जाऊन १५ विविध पशूंची गणना करण्यात येणार आहे. यासाठी ग्रामीण भागात ४५०० कुटुंबांकरिता एक प्रगणक, तर शहरी भागासाठी ६ हजार कुटुंबांसाठी एका प्रगणकाची नियुक्ती करण्यात आली आहे. ४ प्रगणकांमागे एक पर्यवेक्षकाची नियुक्ती करण्यात आली आहे.

पशुगणनेमध्ये गाय, बैल (देशी, संकरित), म्हशी, रेडे, याक, मेंढरे (विदेशी, संकरित), शेळ्या, डुकरे, घाेडे, शिंगरे, खेचर, गाढव, उंट, श्वान, हत्ती यांच्यासह कुक्कुट आणि मत्स्य गणना करण्यात येणार आहे. कुक्कुटपालनामध्ये परसातील, पाेल्ट्री फार्ममधील काेंबडी, काेंबडा, बदके, क्वेल, टर्की, इमू आदींची गणना करण्यात येणार आहे. ‘पशुपालकांनी अचूक माहिती द्यावी’ यंदाची पशुगणना अत्याधुनिक पद्धतीने हाेणार असल्याने, यासाठी शेतकरी, पशुपालकांनी अचूक माहिती द्यावी. या आकडेवारीवर नवीन याेजना आखता येणार आहे. हे शेतकरी आणि पशुपालकांच्या हिताचे असणार आहे. यामुळे शेतकऱ्यांनी पशुगणनेसाठी सहकार्य करावे, असे आवाहन श्री. जानकर यांनी केले.