साखरेवर कर लावण्याची शक्यता

- मे महिन्याच्या पहिल्या आठवड्यात जीएसटी कौन्सिलची बैठक - अडचणीतील साखर उद्योगाला सावरण्याचा प्रयत्न होणार
साखरेवर कर लावण्याची शक्यता
साखरेवर कर लावण्याची शक्यता

नवी दिल्ली : अडचणीतील साखर उद्योगाला दिलासा देण्यासाठी साखरेवर कर लावण्याचा निर्णय केंद्र सरकारच्या विचाराधीन आहे. मे महिन्याच्या पहिल्या आठवड्यात जीएसटी कौन्सीन्सिलची बैठक होणार आहे. या बैठकीत साखरेवर कर लावण्याचा निर्णय घेतला जाऊ शकतो, अशी माहिती सूत्रांनी दिली. ‘‘येणाऱ्या जीएसटी कौन्सिलच्या बैठकीत साखरेवर कर लावण्यासंर्भात विचार होऊ शकतो. यासंबंधीची कायदेशीर परवानगी अद्याप मिळालेली नाही. राज्यांनीही हा विषय पुढील बैठकीत चर्चेला घेण्यास सांगितले आहे,’’ अशी माहिती संबंधित अधिकाऱ्यांनी दिली. या अधीही सरकारने साखर कारखान्यांवर प्रतिक्विंटल १२४ रुपये कर लावला होता. हा कर थेट ग्राहकांवर लादला गेला. या करातून जमा झालेला पैसा अन्न मंत्रालयाच्या अखत्यारितील साखर विकास निधीत गेला. या निधीचा वापर कारखान्यांचे आधुनिकीकरण आणि विस्तार यासाठी वापरला गेला. या कराचा वेगळा असा भार असणार नाही. सध्याच्या कर पद्धतीत बरेचसे अप्रत्यक्ष कर हे जीएसटीमध्ये समाविष्ट झालेले आहेत. अलीकडेच झालेल्या मंत्री समितीच्या बैठकीत ऊस उत्पादकांची साखर कारखान्यांकडे थकलेली जवळपास २० हजार कोटींची देणी देता यावी यासाठी उत्पादन संबंधित अनुदान आणि साखरेवर कर लावण्याच्या प्रस्तावावर चर्चा झाली. यंदा देशात साखर उत्पादन मागील वर्षीच्या उत्पादनापेक्षा १० दशलक्ष टनाने जास्त होऊन ३१ दशलक्ष टन होणार आहे. त्यामुळे सध्या घाऊक बाजारात साखरेचे दर हे मागील २८ महिन्यांच्या निम्न पातळीवर आहेत. त्यामुळे सरकारने कारखान्यांना साखर कोटा ठरवून निर्यात करण्यास सांगितले आहे. परंतु आंतरराष्ट्रीय बाजारात साखर दबावात असल्याने कारखान्यांनी निर्यात अनुदान देण्याची मागणी केली आहे. ‘‘आम्ही ऊस उत्पादकांना गाळप झालेल्या उसावर अनुदान देण्याचा विचार करत आहोत. साखरेवर कर लावल्यानंतर जो निधी जमा होईल त्यातून हे अनुदान दिले जाईल,’’ अशी माहिती अन्न मंत्रालयातील अधिकाऱ्यांनी दिली. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com