गारपीटग्रस्तांना भरीव मदतीचा प्रस्ताव : चंद्रशेखर बावनकुळे

नागपूर ः गारपीटग्रस्तांना सरकारकडून जाहीर करण्यात आलेली मदत प्राथमिक असून त्यासंदर्भाने पुनर्विचार करून भरीव मदत केली जाईल, असे आश्‍वासन नागपूरचे पालकमंत्री तसेच राज्याचे ऊर्जामंत्री चंद्रशेखर बावनकुळे यांनी कृती समितीला दिले. आमदार डॉ. आशिष देशमुख यांच्या नेतृत्वात कृती समितीने सुरू केलेल्या धरणे आंदोलनाला त्यांनी रविवारी (ता. १८) भेट दिली, यावेळी ते बोलत होते. गारपीटग्रस्त संत्रा, मोसंबी उत्पादकांना हेक्‍टरी एक लाख रुपयांची भरपाई मिळावी, यासह विविध मागण्यांकरीता आमदार डॉ. आशिष देशमुख यांच्या नेतृत्वात काटोल येथे धरणे आंदोलन करण्यात येत आहे. गेल्या चार दिवसांपासून सुरू असलेल्या या आंदोलनाला भाजप नेते यशवंत सिन्हा यांनी शनिवारी (ता. १७) भेट दिली. दरम्यान, आंदोलनाची तीव्रता वाढल्याने पालकमंत्री चंद्रशेखर बावनकुळे यांनी रविवारी सकाळीच काटोल गाठत मागण्यांबाबत सरकार सकारात्मक असल्याचे सांगत धरणे आंदोलन मागे घेण्याची विनंती केली. परंतु मुख्यमंत्री देवेंद्र फडणवीस यांनी या भागातील गारपीटग्रस्त भागाचा दौरा करेपर्यंत आणि आंदोलनस्थळी येऊन मागण्यांची पूर्तता करेपर्यंत ते मागे घेणार नसल्याचा निर्धार यावेळी व्यक्‍त करण्यात आला. कृती समितीचे अध्यक्ष व प्रयोगशील शेतकरी मनोज जवंजाळ यांनी केळीला ४० हजार रुपये मदतीची घोषणा करण्यात आली. त्याच धर्तीवर संत्रा, मोसंबी उत्पादकांना हेक्‍टरी एक लाख मिळावे, अशी मागणी यावेळी केली. आत्महत्याग्रस्त कुटुंबाला भेट गारपिटीमुळे पिकाचे नुकसान झाल्याने उदरनिर्वाहाची समस्या भेडसावू लागली. परिणामी इसापूर (खु) येथील प्रल्हाद मनोहर धोटे (वय ५५) यांनी शनिवारी (ता. १७) आत्महत्या केली. त्याची दखल घेत ऊर्जामंत्री चंद्रशेखर बावनकुळे यांनी धरणे आंदोलनाला दिलेल्या भेटीनंतर इसापूर गाठले. आमदार डॉ. आशिष देशमुख यांना सोबत चालण्याची विनंती त्यांनी यावेळी केली. त्यानंतर आमदार देशमुख व बावनकुळे यांनी धोटे कुटुंबीयांची भेट घेत त्यांचे सांत्वन केले.