सानुग्रह अनुदानाचा १९९ हेक्टरसाठी प्रस्ताव : बावनकुळे

मुंबई : धुळे जिल्ह्यातील दोंडाईचा सोलर पार्क या प्रकल्पासाठी संपादीत केलेल्या जमिनीपैकी १९९ हेक्टर जमिनीसाठी सानुग्रह अनुदानाचा प्रस्ताव तयार करण्याचे निर्देश ऊर्जामंत्री चंद्रशेखर बावनकुळे यांनी बुधवारी (ता.२४) दिले. धुळे येथील शेतकरी धर्मा पाटील यांनी या प्रकल्पात गेलेल्या जमिनीपोटी योग्य मोबदला मिळाला नसल्याच्या कारणावरून सोमवारी (ता. २२) मंत्रालयात विष पिऊन आत्महत्येचा प्रयत्न केला होता. त्यानंतर प्रशासकीय पातळीवर हालचालींना वेग आला आहे.  सन २००९ मध्ये हा प्रकल्प मंजूर झाला होता. तेव्हापासून या प्रकल्पाबाबत काहीच निर्णण घेतला गेला नाही. राज्य शासनाने याबाबत निर्णय घेऊन प्रकल्पाला गती दिली. या प्रकल्पासाठी ८२४ हेक्टर जमीन घेण्याचे निश्चित करण्यात आले. मेथी आणि विकरण गावातील शेतकऱ्यांची ६७५ हेक्टर खासगी जमिनीही या प्रकल्पासाठी निश्चित झाली. १४९ हेक्टर शासकीय जमीनही या प्रकल्पासाठी घेण्यात आली. खासगी आणि शासकीय मिळून या प्रकल्पासाठी ५२९ हेक्टर जमीन संपादित करण्यात आली. यापैकी ४७६ हेक्टर खासगी व ४५ हेक्टर शासकीय जमिनीचा समावेश आहे. सन २०१२ मध्ये ४७६ हेक्टर जमिनीचा मोबदला नियमानुसार ४७.६० कोटी देण्यात आला. उर्वरीत १९९ हेक्टर जमीन गेलेल्या १३८ शेतकऱ्यांना वाढीव मोबदला हवा होता. या शेतकऱ्यांनी नियमानुसार महसूल विभागाच्या भूसंपादनाच्या कलम १८ नुसार आपली मागणी न्यायालयाकडे नोंदवायची होती. पण कुणीच कलम १८ नुसार वाढीव मोबदल्याची मागणी केली नाही. शेतकऱ्यांचे नुकसान होऊ नये म्हणून या बैठकीत ऊर्जामंत्री चंद्रशेखर बावनकुळे यांनी पर्यटन मंत्री जयकुमार रावल यांच्या उपस्थितीत १९९ हेक्टर जमीन असलेल्या शेतकऱ्यांना सानुग्रह अनुदान देण्याबाबतच्या प्रस्ताव तयार करावयाच्या सूचना महानिर्मितीला दिल्या. त्यानुसारच येत्या आठ दिवसांत या शेतकऱ्यांनाही सानुग्रह अनुदान देण्याचा सकारात्मक निर्णय शासन घेत आहे.

कोरडवाहू जमिनीसाठी जो मोबदला दिला जाईल. त्यापेक्षा दीडपट मोबदला हंगामी बागाईतदारांसाठी तर दुप्पट मोबदला बागाईतदार शेतकऱ्यांना देण्याचा निर्णय या बैठकीत झाला. तसेच पहिल्या खरेदीच्या दिनांकापासून आतापर्यंत या रकमेवर व्याजही देण्याचा निर्णय घेण्यात आला. या बैठकीला ऊर्जा विभागाचे प्रधान सचिव अरविंद सिंग, महानिर्मिती व्यवस्थापकीय संचालक बिपीन श्रीमाळी आदी उपस्थित होते. दरम्यान, त्याआधी राज्य सरकारने शेतकऱ्यांना शेतकरी धर्मा पाटील यांना पंधरा लाख रुपये सानुग्रह अनुदान जाहीर केले होते. मात्र, त्यांच्या मुलाने, नरेंद्र पाटील यांनी ते घेण्यास नकार दर्शविला होता. वाढीव मोबदल्याच्या मागणीवर ते ठाम आहेत.