ई-नाम पोर्टल शेतकऱ्यांच्या हिताचे : मुख्यमंत्री फडणवीस

मुख्यमंत्री देवेंद्र फडणवीस
मुख्यमंत्री देवेंद्र फडणवीस

मुंबई : राष्ट्रीय कृषी बाजार समितीमार्फत चालविण्यात येणारे ई-नाम हे पोर्टल शेतकऱ्यांच्या हिताचे असून, शेतमालासाठी राष्ट्रीय स्तरावर बाजारपेठ उपलब्ध झाली आहे, असे उद्‍गार मुख्यमंत्री देवेंद्र फडणवीस यांनी शुक्रवारी (ता. १२) काढले.  राष्ट्रीय कृषी बाजार समितीच्या कामकाजाचा आढावा घेण्यासाठी आयोजित बैठकीत ते बोलत होते. ई-नाम हे राष्ट्रीय स्तरावरील वेब पोर्टल असून त्याद्वारे सर्व कृषी उत्पन्न बाजार समित्यांबाबत माहिती एकत्रित ठेवण्यात येते. या पोर्टलसंदर्भात आढावा घेण्यासाठी ही बैठक आयोजित करण्यात आली होती.  मुख्यमंत्री म्हणाले, की या पोर्टलसाठी येणाऱ्या सर्व अडचणी दूर करून त्यासाठी लागणारे तांत्रिक सहकार्य, मनुष्यबळ आणि पायाभूत सुविधांसाठी शासन सर्वतोपरी सहकार्य करेल. राज्यातील सर्व बाजार समित्यांनी मध्यस्थांची भूमिका बजावून देशातील उत्तम बाजारपेठ तयार करण्यास मदत करावी. कर्जमाफीसाठी एकत्रित केलेली शेतकरी आणि त्यांच्या बॅंक खात्यांची माहिती, तसेच तालुक्यातील सर्व शेतकऱ्यांची माहिती एकत्रित करून या पोर्टलसोबत लिंक करून मास्टर डाटा तयार ठेवावा.  पणनमंत्री सुभाष देशमुख यांनी राज्यातील सर्व कृषी व्यापारी व शेतकऱ्यांनी यात आपला सहभाग वाढविण्यासंदर्भात महत्त्वपूर्ण सूचना केल्या. कृषी आणि पणन विभागाचे प्रधान सचिव विजय कुमार म्हणाले, की या पोर्टलमुळे व्यवहारात पारदर्शकता आली असून, शेतकऱ्यांना याचा थेट फायदा होणार आहे. आतापर्यंत १ लाख ९२ हजार शेतकऱ्यांनी यामध्ये नोंदणी केली असून, पहिल्या टप्प्यात ४५ बाजार समित्यांची नोंदणी झाली आहे. लवकरच ६० समित्यांची नोंदणी पूर्ण करण्यात येणार आहे. या पोर्टलवरून व्यवहार करण्यासाठी आनलाइन व्यवहाराचे सर्व पर्याय उपलब्ध आहेत. या बैठकीला मुख्यमंत्री कार्यालयाचे प्रधान सचिव प्रवीणसिंह परदेशी, माहिती व तंत्रज्ञान विभागाचे प्रधान सचिव एसव्हीआर श्रीनिवास, पणन संचालक डॉ. अनंत जोग, कृषी पणन मंडळाचे कार्यकारी संचालक सुनील पवार, सुमंत चौधरी, डॉ. अरुण कुलकर्णी, बाजार समित्यांचे सचिव आणि सभापती, शेतकरी उत्पादक कंपन्यांचे प्रतिनिधी उपस्थित होते.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com