दुष्काळसदृश परिस्थिती लवकरच जाहीर करणार ः मुख्यमंत्री

मुंबई ः राज्यातील टंचाईग्रस्त भागात लवकरच दुष्काळ सदृश्य परिस्थिती जाहीर केली जाईल. संभाव्य दुष्काळी परिस्थितीचा मुकाबला करण्यासाठी राज्य शासनाने संपूर्ण तयारी केली आहे. तसेच स्वतः मंत्री प्रत्येक दुष्काळी तालुक्यांना भेटी देऊन प्रत्यक्ष दुष्काळी परिस्थिती आणि उपाययोजनांची पाहणी करतील, अशी माहिती मुख्यमंत्री देवेंद्र फडणवीस यांनी मंगळवारी (ता. ९) दिली. राज्यमंत्री परिषदेच्या बैठकीनंतर ते पत्रकारांशी बोलत होते.  मुख्यमंत्री श्री. फडणवीस पुढे म्हणाले, राज्यात यंदाच्या पावसाळ्यात सरासरीच्या ७७ टक्के इतकाच पाऊस झाला आहे. काही भागात पावसाने मोठी उघडीप दिली आहे. संभाव्य दुष्काळी परिस्थितीच्या पार्श्वभूमीवर कोण-कोणत्या उपाययोजना करायच्या आहेत याचा सविस्तर आढावा मंत्री परिषदेच्या बैठकीत घेण्यात आला. केंद्र सरकारच्या दुष्काळी मॅन्युअल २०१६ मध्ये दुष्काळी परिस्थितीच्या अनुषंगाने टप्प्यांची माहिती दिली आहे. त्यासाठीचा कालावधी निश्चित करण्यात आला आहे. त्यानुसार हे मोजमापाचे काम आधीपासूनच सुरू करण्यात आले आहे. ठरलेल्या वेळेत हे काम पूर्ण होऊन प्रक्रियेला विलंब होणार नाही, याची दक्षता घेण्याचे आदेश प्रशासनाला देण्यात आले आहेत. त्यानंतर टंचाईग्रस्त भागात लवकरच दुष्काळ सदृश्य परिस्थिती जाहीर केली जाईल. तसेच उपाययोजनाही लागू केल्या जातील. सध्या यासंदर्भातील माहितीचे विश्लेषण युद्धपातळीवर सुरू आहे. केंद्र सरकारचे पथक राज्यातील दुष्काळी स्थितीची पाहणी करण्यासाठी राज्याच्या दौऱ्यावर येईल. त्यासोबतच दुष्काळाचे उर्वरित टप्पेही पूर्ण केले जातील.  या बैठकीला मंत्रिमंडळातील सर्व मंत्री, राज्यमंत्री उपस्थित होते. दुष्काळी स्थितीचे नियोजन दुष्काळी परिस्थितीत नागरिकांना पिण्याचे पाणी, जनावरांना चारा आदी प्रश्न निर्माण होणार आहे. त्याचेही नियोजन या बैठकीत करण्यात आले आहे. त्याचबरोबर शासनाने सर्व मंत्री, राज्यमंत्री या सर्वांना निर्देश दिले आहेत की, त्यांनी दुष्काळी जिल्ह्यात जाऊन प्रत्यक्ष दुष्काळी परिस्थितीची माहिती घ्यावी. जिल्ह्यातील प्रत्येक तालुक्याला भेटी देऊन दुष्काळाची तीव्रता, लोकांच्या अडचणी समजावून घ्याव्यात. त्यामुळे स्थानिक यंत्रणाही जलदगतीने काम करेल तसेच त्यांच्यावर काऊंटर चेकही राहिल. यासंदर्भातील एक कार्यक्रम निश्चित करून मंत्र्यांवर ही जबाबदारी सोपवण्यात येणार आहे, असेही मुख्यमंत्री फडणवीस यांनी सांगितले.