अश्‍व संग्रहालय आकर्षण ठरणार ः मुख्यमंत्री

सारंगखेडा, जि. नंदुरबार : अश्‍व संग्रहालय जगाच्या आकर्षणाचे केंद्रबिंदू ठरावे, यासाठी राज्य सरकार सतत प्रयत्नशील आहे. येत्या तीन वर्षांत ही यात्रा आणि चेतक महोत्सव जागतिक पातळीवर पोचून विदेशातील पर्यटक येथे येतील. या भागातील प्रकाशा, तोरणमाळच्या विकासासाठी १८ कोटी रुपये मंजूर करण्यात आले आहेत. त्यातून या भागाला रोजगार निर्मितीला चालना मिळेल, असा विश्‍वास मुख्यमंत्री देवेंद्र फडणवीस यांनी आज येथे व्यक्त केला.  येथे अश्‍वसंग्रहालयाच्या इमारत बांधकामाचे भूमिपूजन श्री. फडणवीस यांच्या हस्ते शुक्रवारी (ता. ८) झाले. पर्यटनमंत्री जयकुमार रावल, आमदार विजयकुमार गावित, खासदार हीना गावित, प्रधान सचिव नितीन गर्दे, आयुक्त महेश झगडे, महानिरीक्षक विनय चौबे, पर्यटन विभागाचे संचालक विजय वाघमारे, आशुतोष राठोड, जिल्हाधिकारी अनिल पाटील, पोलिस अधीक्षक संजय पाटील, स्वाती पाटील, रेखा चौधरी, जिल्हा परिषद सदस्य जयपाल, जिल्हा परिषद सदस्या ऐश्‍वर्या रावल, सरपंच भारती कोळी, जिल्हा परिषदेचे मुख्य कार्यकारी अधिकारी बी. मोहन उपस्थित होते.  श्री. फडणवीस म्हणाले, की येथे अश्‍वांची माहिती देणारे अतिशय सुंदर चित्रप्रदर्शन आहे. सारंगखेड्याला अश्‍व संग्रहालय तयार करा असे सुचवले होते. त्याचे भूमिपूजन आज केले. देशातील सर्वांत सुंदर संग्रहालय व्हावे, ते जगाचे आकर्षण होईल असे करण्यात येईल. ब्रिडिंग दवाखान्याची सोय व्हावी, अशी मागणी आहे. केंद्र आणि राज्य सरकारच्या मदतीने ते काम करण्यात येईल. जगात सर्वाधिक रोजगार पर्यटनातून तयार होतो. या महिनाभरात येथे मोठ्या प्रमाणात पर्यटक येणार आहेत. कच्छच्या रण उत्सवाप्रमाणे तीन वर्षांत चेतक महोत्सव जागतिक स्तरावर गेलेला असेल. पुढच्या वर्षी जपानसह अन्य देशांतील पर्यटक विमानातून येथे येतील.  पर्यटनमंत्री जयकुमार रावल म्हणाले, ‘‘दत्त यात्रा, युद्धासाठीचे घोडे देश-विदेशांतून येतात. आदिवासींची संस्कृती आहे. या तिघांचा संगम आहे. पर्यटनाला चालना मिळावी यासाठी धुळे येथे प्रकल्प कार्यालय सुरू करण्यात येणार आहे.