जळगाव ः जिल्ह्यात मागील आठवड्यात केळीच्या दरात क्विंटलमागे ३० रुपये दरवाढ झाली. बॉक्‍स पॅकिंगच्या केळीला ऑनचे दरही मिळत आहेत. जुनारी बागांमधील केळी संपण्याची स्थिती आहे. रावेरात केळीला १०४० तर जळगावात ९९० रुपये प्रतिक्विंटलचे दर आहेत.
२७ ते ३० किलो रासच्या केळीची बॉक्‍समध्ये पॅकिंग करून ती उत्तर भारतात पाठविली जात आहे. सध्या जळगाव, चोपडा भागात केळी अधिक उपलब्ध होत असून, अर्ली कांदेबागांमधून केळीचा पुरवठा वाढला आहे. जळगाव व चोपडा भागातील तापी व अनेर नदीच्या काठानजीकच्या भागात चांगला पुरवठा सुरू आहे. याच भागातून केळीची उत्तर भारतात पाठवणूक होत आहे. प्रतिदिन १०० ते १२० ट्रक (एक ट्रक १५ मेट्रिक टन क्षमता) आवक या भागात सुरू आहे.
सध्या उत्तर भारत व आंध्र प्रदेशातील केळी कापणी सुरू नसल्याने जळगाव व चोपडा भागातील दर्जेदार केळीला चांगला उठाव आहे. परंतु, पुढील महिन्यात उत्तर व मध्य भारतात केळीची कापणी सुरू होईल. आंध्र प्रदेशातूनही पुरवठा सुरू होईल, असे सांगितले जात आहे.
यावल व रावेरात केळीचा पुरवठा कमी आहे. फक्त मागील वर्षी सप्टेंबरमध्ये लागवड केलेल्या केळीची कापणी तांदलवाडी, निंबोल, वाघोदा भागात सुरू आहे. जुनारी केळी बागांची कापणी जवळपास आटोपली आहे. पिलबागांमधूनही केळीची आवक कमी आहे. पिलबागांमधील केळीला प्रतिक्विंटल ८७० रुपये प्रतिक्विंटलचा दर रावेर भागात मिळाला. जळगाव, चोपडा, जामनेर भागात पिलबाग केळीचा पुरवठा शून्य टक्के असल्याचे सांगण्यात आले.
यावल, रावेर भागात प्रतिदिन २०० ट्रक केळी उपलब्ध होत आहे. मुक्ताईनगरमधील तापी काठावरील भागात पिलबाग व जुनारी बागांमधून केळी फारशी उपलब्ध होत नसल्याची स्थिती आहे. उत्तर भारतात श्रावणमासानिमित्त केळीची मागणी कायम होती. तेथे २० रोजी शेवटचा श्रावण सोमवार होता. पण पश्‍चिम भागात महाराष्ट्र, गुजरातेत श्रावण मास अजून अर्धाअधिक राहिला आहे. त्यामुळे केळीची स्थानिक (लोकल) मागणी कायम राहणार आहे. ठाणे, कल्याण व मुंबई येथून ही मागणी कायम राहिली. काही खरेदीदारांनी घेतलेली जुनारी केळी उत्तर भागात पाठविण्यात आली, पण ती अपेक्षित स्थळी पोचेपर्यंत पिकल्याच्या तक्रारी आल्याने रावेर, यावल भागातील जुनारी केळीची पाठवणूक बाजार समित्यांमध्ये करावी लागली, असे सांगण्यात आले.
मध्य प्रदेशात कांद्याची पाठवणूक जिल्ह्यातील जळगाव, चोपडा भागातील व्यापाऱ्यांनी कांद्याची पाठवणूक मध्य प्रदेशात केली. तेथून मागील आठवड्यात मागणी वाढली. कांद्याची शेतकऱ्यांकडून कुठलीही आवक नाही. परंतु व्यापारी ते व्यापारी, असे व्यवहार झाले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.