मुख्यमंत्री, पवार, गडकरी यांचे मराठवाड्यातील दौरे रद्द

औरंगाबाद : कोरेगाव भीमा येथील घटनेनंतर गेल्या तीन दिवसांपासून राज्यात उमटत असलेले हिंसक पडसाद आणि ‘बंद’च्या पार्श्‍वभूमीवर राजकीय नेत्यांचे मराठवाड्यातील नियोजित दौरे रद्द करण्यात आले आहेत. मुख्यमंत्री देवेंद्र फडणवीस, केंद्रीय मंत्री नितीन गडकरी, माजी कृषिमंत्री व राष्ट्रवादीचे अध्यक्ष शरद पवार हे आज (ता. ५) विविध कार्यक्रमांना हजेरी लावण्यासाठी मराठवाड्यात येणार होते. शुक्रवारी (ता. ५) औरंगाबाद येथे ५ ते ८ जानेवारीदरम्यान भरवण्यात येणाऱ्या राज्यस्तरीय ''महा-ऍग्रो'' कृषी प्रदर्शनाच्या उद्‍घाटनासाठी मुख्यमंत्री देवेंद्र फडणवीस, शरद पवार हे एकाच व्यासपीठावर येणार होते. तर केंद्रीय मंत्री नितीन गडकरी हे बीड जिल्ह्यातील अंबाजोगाई सहकारी साखर कारखान्याजवळील रस्त्यांच्या कामांस प्रारंभ करण्यासाठी बीड जिल्ह्यात उपस्थित राहणार होते. परंतु या तीनही प्रमुख नेत्यांचे मराठवाड्यातील नियोजित कार्यक्रम रद्द करण्यात आल्याची माहिती आहे.  बुधवारच्या ‘महाराष्ट्र बंद’दरम्यान, मराठवाड्यात अनेक हिंसक घटना घडल्या. त्यामुळे आजपासून बाजरपेठा सुरू झाल्या असल्या तरी वातावरण अद्याप पूर्णपणे निवळलेले नाही.