युती झाली नाही, तर राज्यात कॉँग्रेसची सत्ता ः महसूलमंत्री चंद्रकांत पाटील

मुंबई  : आगामी लोकसभा आणि विधानसभा निवडणुकांसाठी राज्यात भाजप आणि शिवसेना या पक्षांची युती व्हायला पाहिजे, जर युती झाली नाही, तर राज्यात कॉँग्रेसची सत्ता येईल, अशी भीती राज्याचे महसूलमंत्री चंद्रकांत पाटील यांनी शुक्रवारी (ता. १) व्यक्त केली. पालघर आणि भंडार गोंदिया येथील लोकसभांच्या पोटनिवडणुकीच्या निकालानंतर शिवसेना नाराज झाली असून, शिवसेनेने भाजपवर थेट निशाणा साधला आहे. हा पक्ष सत्ता आल्यानंतर मित्रपक्षांना बाजूला करतो, असे विधान शिवसेनाप्रमुख उद्धव ठाकरे यांनी केले होते. या पार्श्वभूमीवर बोलताना चंदाकांत पाटील यांनी राज्यात युती होणे गरजेचे असल्याचे मत व्यक्त केले. उद्धव ठाकरे यांनी आता स्वबळावर लढण्याची भाषा केली असली आणि आतापर्यंतच्या काही निवडणूका दोन्ही पक्षांनी स्वतंत्रपणे लढवल्या असल्या तरी यापुढील निवडणूका युतीनेच लढायला हव्यात. त्यामुळे उद्धव ठाकरे राज्याच्या अहिताचा निर्णय घेणार नाहीत, अशी आशा पाटील यांनी व्यक्त केली.  जर युती झाली नाही, तर मात्र राज्यात राष्ट्रवादी आणि कॉँग्रेसचे सरकार आल्यावाचून राहणार नाही, अशी कबुलीच पाटील यांनी या वेळी दिली. पाटील यांच्या या विधानामुळे त्यांनी देशभरातील पोटनिवडणुकांच्या निकालाचा धसका घेतला असावा, तसेच मोदी यांची जादू ओसरत चालल्याची भीती त्यांना सतावत असावी, अशी चर्चा राजकीय वर्तुळात सुरू होती.  दरम्यान, राज्याच्या मंत्रिमंडळात सहभागी असलेल्या शिवसेनेच्या राज्यमंत्र्यांना कोणतेही अधिकार दिले गेले नसल्याबाबत पाटील यांना विचारले असता, अशी काही स्थिती नसून, भाजपच्या राज्यमंत्र्यांना जेवढे अधिकार आहेत तेवढेच अधिकार शिवसेनेच्या राज्यमंत्र्यांना असल्याचे त्यांनी स्पष्ट केले.