दक्षिण नगरच्या जागेबाबत राष्ट्रवादी काँग्रेसमध्ये ताळमेळ दिसेना

नगर   ः दक्षिण लोकसभा मतदारसंघाची (नगर) जागा काँग्रेसला द्यावी आणि शिर्डी लोकसभा मतदारसंघाची जागा राष्ट्रवादीला द्यावी, असे मी राष्ट्रवादी पक्षाच्या वरिष्ठांना बैठकीत सांगितले आहे, असे राष्ट्रवादीचे प्रदेश उपाध्यक्ष माजी आमदार पांडुरंग अभंग यांनी दोन दिवसांपूर्वी सांगितले होते. मात्र अभंग यांच्या वक्तव्याला अजिबात किंमत नाही, दक्षिणेची जागा राष्ट्रवादीने लढवावी अशी कार्यकर्त्यांची इच्छा आहे, असे राष्ट्रवादीचे पक्ष निरीक्षक अंकुश काकडे यांनी शुक्रवारी (ता. ७) स्पष्ट केले. त्यामुळे गेल्या काही दिवसांपासून चर्चेत असलेल्या दक्षिणेच्या जागेबाबत राष्ट्रवादी काँग्रेसमध्ये ताळमेळ नसल्याचे स्पष्ट झाले आहे.

नगर लोकसभा मतदार संघ (दक्षिण) राष्ट्रवादीकडे आहे. मात्र येथून लढण्यासाठी विधानसभेतील विरोधी पक्ष नेते राधाकृष्ण विखे पाटील यांचे चिरंजीव, डॉ. सुजय विखे पाटील इच्छुक आहेत. माजी उपमुख्यमंत्री अजित पवार, पक्षाचे जिल्हाध्यक्ष राजेंद्र फाळके यांनी ‘दक्षिण आमच्याकडे राहील, आम्ही लढवणार’, असे स्पष्ट केलेले आहे.

अभंग यांच्या वक्‍तव्यावर मात्र शुक्रवारी अंकुश काकडे यांनी नाराजी व्यक्त केली आहे. जागा बदल, उमेदवारी देण्याचा निर्णय ज्येष्ठ नेते शरद पवार घेतात. त्यामुळे अभंग यांच्या वक्तव्याला अजिबात किंमत नाही. त्यांनी पक्षाच्या बैठकीत असा कोणताही मुद्दा मांडलेला नाही.  याआधी आमदार राहुल जगताप यांनीही असे वक्तव्य केले होते. पक्षाचा विषय असा जाहीर बोलू नये अशी समज दिली आहे. अभंग यांच्या वक्तव्यानंतर लगेचच काकडे यांनी स्पष्टीकरण दिल्याने दक्षिणेच्या जागेबाबत राष्ट्रवादीत ताळमेळ नसल्याचे स्पष्ट झाले आहे.

`कार्यकर्त्यांचीच आहे इच्छा` अंकुश काकडे म्हणाले, की नगर दक्षिण लोकसभा मतदारसंघात राष्ट्रवादीचा दोन वेळा पराभव झाला. याचा अर्थ येथे ताकद नाही असा होत नाही. चंद्रशेखर घुले, प्रताप ढाकणे, दादाभाऊ कळमकर, गडाखही इच्छुक आहेत.  राष्ट्रवादीकडे दक्षिण लोकसभेसाठी सक्षम उमेदवार आहे. अभंग व राहुल जगताप वगळता दक्षिणेची जागा लढवावी राष्ट्रवादीने लढवावी, अशी कार्यकर्त्यांची इच्छा आहे.