कृषिपंप देयक वसुलीसाठी संपूर्ण फीडरच केले बंद

वाशीम : वीज बिल वसुलीसाठी वाशीम जिल्ह्यातील शिरपूर जैन परिसरात महावितरण कंपनीने रविवारी कृषीचे फीडरच संपूर्ण बंद केले. यामुळे धास्तावलेल्या शेतकऱ्यांनी सोमवारी कंपनीच्या कार्यालयात जाऊन धडक दिली. अधिकारी व शेतकऱ्यांत चर्चा झाल्यानंतर वीज पूर्ववत सुरू करण्यात अाली अाहे.

सध्या रब्बी हंगामाची लगबग सुरू अाहे. खरिपातील पिके निघाली; पण भाव नसल्याने शेतकरी अाधीच संकटात अालेला अाहे. अनेकांनी शेतमाल विकलेला नाही, असे असताना वीज कंपनीने कृषिपंप देयक वसुलीसाठी रविवारी (ता.२९) शिरपूर येथून कृषी फीडर बंद केले. वीजपुरवठा खंडित झाल्याने शेतकऱ्यांमध्ये मोठा असंतोष पसरला. वीजपुरवठा खंडित झाल्याने रब्बीतील हरभरा, गहू, तसेच तूर, हळद, भाजीपाला या पिकांना पाणी देण्याची अडचण तयार झाली होती.

रब्बीतील पिके हातातून जातील की, काय अशी भीती शेतकऱ्यांना वाटू लागली होती. त्यामुळे शिरपूर, शेलगाव इंगोले, दुधाळा, पांगरखेडा, करंजी व इतर गावांतील शेतकरी एकत्र येऊन वीज कंपनीच्या कार्यालयावर धडकले. शेतकऱ्यांनी प्रत्येकी किमान तीन हजार रुपये भरणा करावेत, असे वीज कंपनीच्या अधिकाऱ्यांनी सांगितले. कृषीचे फीडर बंद केल्याने शेकडो शेतकऱ्यांच्या शेतातील वीज गुल झाली होती. सोमवारी तोडगा निघाल्याने या शेतकऱ्यांना तूर्त दिलासा मिळाला; परंतु भरणा न केल्यास पुन्हा वीजपुरवठा खंडित होण्याची टांगती कुऱ्हाड कायम अाहे.

ग्रामीण भागात असंतोष शेतमालाला अाधीच भाव नाहीत. ज्यांना उत्पादन झाले अशा शेतकऱ्यांनी हा शेतमाल विकलासुद्धा नाही. अशा परिस्थितीत वीज कंपनीने वसुलीसाठी पुरवठा खंडित करण्याची मोहीम हाती घेतली अाहे. एेन रब्बी हंगामात लागवडीची धावपळ सुरू असताना वीजपुरवठा बंद करून शेतकऱ्यांना वेठीस धरण्यात येत अाहे. या प्रकारामुळे शेतकऱ्यांमध्ये असंतोष वाढला अाहे.