अकोला जिल्ह्यातील सिंचन प्रकल्प तातडीने पूर्ण करा

अकोला : सिंचन आणि पिण्याच्या पाण्यासाठी जिल्ह्यातील प्रकल्प पूर्ण होणे गरजेचे आहेत. मागील वर्षी हे प्रकल्प पूर्ण करण्यासाठी ज्या अडचणी समोर आल्या होत्या, त्या दूर करण्यासाठी राज्य शासनाने प्रयत्न केले असून, अपूर्ण प्रकल्प पूर्ण करण्यासाठी आवश्‍यक असलेल्या आराखड्यांना मान्यता देण्यात आली आहे. तसेच सुधारित प्रशासकीय मान्यता दिल्याने आता हे प्रकल्प वेळेत पूर्ण करावेत, असे निर्देश मुख्यमंत्री देवेंद्र फडणवीस यांनी यंत्रणांना दिले.

नागपूर येथे अकोला जिल्हा आढावा बैठकीत ते बोलत होते. या वेळी पालकमंत्री डॉ. रणजित पाटील, खासदार संजय धोत्रे, आमदार गोवर्धन शर्मा, गोपीकिशन बजोरिया, रणधीर सावरकर, प्रकाश भारसाकळे, हरीश पिंपळे, बळिराम शिरस्कार, महापौर विजय अग्रवाल, मुख्य सचिव सुमीत मल्लिक, मुख्यमंत्र्यांचे अप्पर मुख्य सचिव प्रवीणसिंह परदेशी, विभागीय आयुक्त पीयूष सिंह, जिल्हाधिकारी आस्तिककुमार पाण्डेय, जिल्हा परिषदेचे मुख्य कार्यकारी अधिकारी एस. रामामूर्ती यांच्यासह इतर उपस्थित होते.

या वेळी जिल्हाधिकारी श्री. पाण्डेय यांनी जिल्ह्यातील कामांबाबत सादरीकरण केले. त्यानुसार मुख्यमंत्र्यांनी मागेल त्याला शेततळे, जलयुक्त शिवार योजना, धडक सिंचन विहिरी, मुख्यमंत्री ग्रामसडक योजना, कृषिपंपांसाठी वीजजोडणी, स्वच्छ भारत अभियान, सिंचन प्रकल्प आणि जिल्ह्यातील महत्त्वाच्या प्रश्नांबाबत आढावा घेतला.  

कवठा बॅरेजसाठी ९० कोटी जिल्ह्यातील कवठा, काटीपाटी, घुंगशी बॅरेज या प्रकल्पांच्या पूर्णत्वासाठी आवश्‍यक असलेल्या बाबींना तातडीने मान्यता देण्यात आल्या. कवठा बॅरेजचे काम जूनपर्यंत पूर्ण करण्यासाठी ९० कोटींचा निधी दिला जाणार आहे. उमा बॅरेजला आलेल्या पाच अडचणी दूर करण्यात आल्या आहेत.

शेततळ्यांची कामे तातडीने पूर्ण करावेत जिल्ह्यात ३५०० शेततळ्यांचे उद्दिष्ट देण्यात आले असून, जून २०१८ पर्यंत पूर्ण करण्यासाठी आवश्‍यक ती कार्यवाही करण्याचे निर्देश मुख्यमंत्र्यांनी दिले. खारपाण पट्ट्यासाठी शेततळे अत्यंत उपयुक्त आहेत. त्यामुळे या भागात प्राधान्याने शेततळ्यांची कामे पूर्ण करावीत. जलयुक्त शिवार अभियानाचे हे तिसरे वर्ष आहे. या अभियानांतर्गत ठरवलेली कामे तातडीने पूर्ण करावीत. शेतकऱ्यांना सिंचनाची सुविधा उपलब्ध करून देण्यासाठी धडक सिंचन विहीरअंतर्गत ५४३४ विहिरीपैंकी ४६१२ विहिरी पूर्ण झाल्या आहेत. उर्वरित विहिरींचे उद्दिष्ट तातडीने पूर्ण करण्याची सूचनाही फडणवीस यांनी दिली.