पीक कर्जवाटपाचे उद्दिष्ट पूर्ण करा : डॉ. राजेंद्र भोसले

सोलापूर : राष्ट्रीयीकृत बॅंकांनी खरीप पीक कर्जवाटपात समाधानकारक कामगिरी केलेली नाही, अशा बॅंकांनी रब्बी पीक कर्जवाटपात आता गतीने काम करावे. पीक कर्जवाटपाचे उद्दिष्ट राष्ट्रीयीकृत बॅंकांनी पूर्ण करावे, अशी सूचना जिल्हाधिकारी डॉ. राजेंद्र भोसले यांनी दिली.

जिल्हाधिकारी कार्यालयातील बहुउद्देशीय सभागृहात जिल्हास्तरीय बॅंकर्स समन्वय समितीची नुकतीच बैठक झाली. त्या बैठकीत हा आराखडा प्रसिद्ध करण्यात आला. या वेळी भारतीय रिझर्व्ह बॅंकेचे सरव्यवस्थापक मोहन सांगवेकर, डीआरडीएचे प्रकल्प संचालक ए. जी. नवाळे, नाबार्डचे जिल्हा व्यवस्थापक प्रदीप झिले, जिल्हा उपनिबंधक अविनाश देशमुख, अग्रणी बॅंक व्यवस्थापक सुरेश श्रीराम आदी उपस्थित होते.

या बैठकीत खरीप आणि रब्बी हंगामासाठी पीक कर्जवाटपाचा आढावा घेण्यात आला. छत्रपती शिवाजी महाराज शेतकरी सन्मान योजनेतून जिल्ह्यातील किती शेतकऱ्यांना किती रुपयांची कर्जमाफी देण्यात आली याची माहिती दररोज जिल्हा उपनिबंधकांना सादर करायला हवी, ती माहिती राष्ट्रीयीकृत बॅंकांनी द्यावी, अशा सूचना जिल्हाधिकारी डॉ. राजेंद्र भोसले यांनी दिल्या.

मुद्रा योजना आणि स्टार्टअप इंडिया योजनेतील कर्जदारांना सर्व बॅंकांनी त्यांची कागदपत्रे तपासून कर्ज द्यावे. या योजनेत जिल्ह्यात ६६० प्रकरणे करायची होती, पण त्या तुलनेत फारच कमी प्रकरणे मंजूर करण्यात आली आहेत. मुद्रा बॅंक योजनेत कर्जदारांना बॅंकेत खाते नसले, तरीही कर्ज देण्याच्या सूचना श्री. भोसले यांनी दिल्या.