कोल्हापूर येथे १० ऑक्‍टोबरला ऊस परिषद : रघुनाथदादा पाटील

कोल्हापूर  : सरकारने एफआरपीचे तुकडे करून शेतकऱ्यांचे नुकसान केले आहे. त्यामुळे सर्व एफआरपी एकरकमी मिळाली पाहिजे. तसेच, ९ टक्के उताऱ्यानुसारच यावर्षीची एफआरपी मिळाली पाहिजे. यासाठी, १० ऑक्‍टोबरला कोल्हापूर येथील शाहू स्मारक भवन येथे दुपारी १२ ते ४ या वेळेत ऊस परिषद घेणार असून, यामध्ये भूजल कायदा, वीज दर आकारणीबाबतही आवाज उठवला जाणार असल्याची माहिती शेतकरी संघटनेचे अध्यक्ष रघुनाथदादा पाटील यांनी गुरुवारी दिली. कोल्हापूर प्रेस क्‍लब येथे झालेल्या पत्रकार परिषदेत त्यांनी ही माहिती दिली.

श्री. पाटील म्हणाले, की केंद्र सरकार एफआरपीचे तुकडे करत आहे. सध्याची एफआरपी १४ दिवसांत देण्याचा कायदा असतानाही त्याचे दोन ते तीन तुकडे केले जातात, कायदा मोडला जातो. असे असताना आता एफआरपीची रक्कम दोन टप्प्यांत देण्याची मागणी केली जात आहे. हा निर्णय पूर्ण चुकीचा आहे. गेल्या वर्षी पालकमंत्री चंद्रकांत पाटील यांच्या मध्यस्थीने एफआरपी अधिक २०० रुपये, असा दर देण्याचे कारखान्यांनी मान्य केले होते. मात्र, वरील २०० रुपयांबाबत आता कोणीही बोलत नाही. काहींची एफआरपीची रक्कमही थकली आहे. शासनाने यावर तत्काळ निर्णय घेतला पाहिजे.

याशिवाय शेतकऱ्यांना कर्जमुक्ती मिळाली पाहिजे, पाणी उपशावर भूजल कायदा करून शेतकऱ्यांची लूट केली जाणार आहे. शेतकऱ्यांना आरोपीच्या पिंजऱ्यात उभे केले जात आहे. त्यामुळे या सर्व मुद्द्यांवर आवाज उठविला जाणार आहे.   ९ टक्के उतारा गृहीत धरावा एफआरपी ठरवताना ९ टक्के उताराच गृहीत धरला पाहिजे. यामध्येही शासनाने १० टक्के उतारा धरून एफआरपी जाहीर केल्यामुळे शेतकऱ्यांना उत्पादन खर्चानुसार दर मिळण्यास अडचणी येणार आहेत. त्यामुळे ९ टक्के उताऱ्याप्रमाणेच दर मिळावा, यासाठी आवाज उठविला जाणार असल्याचे श्री. पाटील यांनी सांगितले.