सोलापुरात कर्जमाफीच्या लाभाबाबत गोंधळाची स्थिती

सोलापूर: राज्य सरकारने शेतकऱ्यांच्या कर्जमाफीसाठी ‘छत्रपती शिवाजी महाराज शेतकरी सन्मान’ योजना आणली, शिवाय या योजनेतील काही लाभार्थ्यांना मुहूर्तावर प्रमाणपत्रवाटप करूनही अद्यापही शेतकऱ्यांच्या खात्यावर काहीच रक्कम जमा झाली नाही. उलट शेतकऱ्यांच्या यादीवरून अद्यापही गोंधळाची स्थिती आहे. किमान प्रमाणपत्रवाटप झालेल्या शेतकऱ्यांच्या खात्यावर तातडीने कर्ज रक्कम जमा दाखवण्यासंबंधी जिल्हा उपनिबंधकांनी जिल्हा बॅंकेला सूचना केली आहे.  गेल्या आठवड्यात लाभधारक शेतकऱ्यांच्या नावांच्या याद्या तयार झाल्या; पण या यादीतील शेतकऱ्यांच्या बॅंक खात्यात अद्यापही रक्कम जमा झालेली नाही. जिल्ह्यातील ज्या २८ शेतकऱ्यांना प्रमाणपत्र देण्यात आले आहे, ते सर्व कर्जदार शेतकरी सोलापूर जिल्हा बॅंकेचे खातेदार आहेत. या शेतकऱ्यांच्या खात्यावर असलेले कर्ज जमा करून घ्यावे व ही रक्कम राज्य सरकारकडे येणेबाकी दाखवावी, असे सूचनावजा पत्र जिल्हा उपनिबंधक अविनाश देशमुख यांनी जिल्हा बॅंकेला दिले आहे. यावरून प्रमाणपत्रवाटप झालेल्या शेतकऱ्यांच्या खात्यावर अजूनही काही नाही, मग उर्वरित शेतकऱ्यांच्या खात्यावर कधी, हा प्रश्‍न विचारला जातो आहे.  सहकार विभागाने त्यासाठी पाठपुरावा सुरू केला आहे; पण बॅंका अजूनही पुढे येताना दिसत नाहीत. दिवाळीपूर्वी कर्जमाफीचे आश्‍वासन देऊनही प्रशासनाला हा शब्द पाळता आलेला नाही. जिल्हा बॅंकेलाही पैसे जमा दाखवा, अशी सांगण्याची वेळ आली आहे. राष्ट्रीयीकृत बॅंका तर शेतकऱ्यांचे ऐकायलाही तयार नाहीत. सरकारकडून आल्यावर पाहू, अशीही उत्तरे काही ठिकाणी मिळत आहेत. त्यामुळे शासनाने यासंबंधी तातडीने पाऊल उचलण्याची गरज आहे.