सांगलीत हमीभाव केंद्रावर गोंधळाचीच हमी

सांगली : दिवाळीच्या पार्श्वभूमीवर उडीद, मूग व सोयाबीनचे बिल पदरात पाडून घेण्यासाठी शेतकऱ्यांची लगबग सुरू असताना, ऑनलाइन सात-बारा उताऱ्यातील अडचणी अद्याप कायम आहेत. त्यातच जिल्ह्यात हमीभाव खरेदी केंद्रे सुरू करण्यास प्रस्तावच दाखल झाले नसल्याने केवळ तीन ठिकाणी नोंदणी सुरू करण्यात आली आहे. जिल्हाभरातून केवळ ८७ शेतकऱ्यांनीच नोंदणी केली आहे. मात्र, शेतीमालाची खरेदी केव्हा सुरू होणार, असा प्रश्‍न शेतकरी उपस्थित करू लागले आहेत.

राष्ट्रीय कृषी सहकारी विपणन संघ (नाफेड) मार्फत आधारभूत किंमत खरेदी योजनेंतर्गत सोयाबीन, मूग व उडीद हमीभाव केंद्रे जिल्ह्यात सुरू करण्याचे नियोजन करण्यात आले होते. यासाठी प्रसिद्धी देऊनही जिल्हाभरातून अल्प प्रतिसाद मिळाला आहे. जिल्ह्यात प्रत्येक तालुक्‍याच्या ठिकाणी खरेदी केंद्र अपेक्षित असताना, केवळ सांगली, तासगाव व विटा येथेच खरेदी केंद्रे सुरू करण्यात आली आहेत. उर्वरित ठिकाणी खरेदी केंद्रे सुरू करण्यासाठी एकाही संस्थेकडून प्रस्ताव आलेला नसल्याने त्या भागातील शेतकऱ्यांची मोठी पंचाईत झाली आहे.

जिल्ह्यात सांगली येथे विष्णुअण्णा पाटील खरेदी-विक्री संघ, खानापूर तालुका खरेदी-विक्री संघ, विटा व आर. आर. पाटील खरेदी-विक्री संघ तासगाव या तीनच ठिकाणी नोंदणी सुरू आहे. याउलट जतसारख्या ठिकाणी उडदाची अधिक नोंदणी अपेक्षित असताना त्या ठिकाणी एकाही संस्थेने केंद्र सुरू करण्याबाबत प्रस्ताव दिलेला नाही, तसेच वाळवा तालुक्‍यातही सोयाबीनचे क्षेत्र चांगले असताना तेथेही खरेदी केंद्रासाठी प्रस्ताव आलेला नसल्याने शेतकऱ्यांना इतरत्र शेतीमाल न्यावा लागतोय.

खरीप हंगामातील पिकांची काढणी होऊन दोन महिने झाले आहेत. शेतीमालाची किमान आधारभूत किंमत ही बाजारातील दरापेक्षा अधिक आहे. मात्र, खरेदी सुरू झाली नसल्याने शेतकऱ्यांना कमी दरात शेतीमालाची विक्री करावी लागत आहे. खरेदी केंद्राची अडचण असतानाच शेतीमालाच्या नोंदणीसाठी ऑनलाइन सात-बारा उतारा सक्तीचा करण्यात आला आहे.

तासगावला मूगासाठी एकाचीही नोंद नाही सांगलीत सोयाबीनसाठी एकाही शेतकऱ्याने नोंदणी केलेली नाही, तर उडिदाची ६०, तर मुगाची केवळ ३ शेतकऱ्यांनी नोंदणी केली आहे. तासगावला सोयाबीनला ३, उडदासाठी २, तर मूगासाठी एकाही शेतकऱ्याची नोंद नाही. विटा येथे सोयाबीनची २, उडीद १४, तर मुगाची ३ शेतकऱ्यांनी आजवर नोंदणी केली आहे.