कॉंग्रेस जाहीरनाम्यासाठी घेणार समाज घटकांचे मत

नागपूर : लोकसभा निवडणुकीचे पडघम वाजायला सुरवात झाल्यानंतर आता कॉंग्रेसने निवडणूक जाहीरनाम्यासाठी देशभर फिरून देशातील विविध समाज घटकांचे मत जाणून घेण्याची मोहीम हाती घेतली आहे.

अखिल भारतीय कॉंग्रेस समितीच्या "आयडीयाज फॉर ए प्रोग्रेसीव्ह इंडिया' उपक्रमांतर्गत सोमवारी (ता.२६) समाजातील विविध घटकांच्या प्रतिनिधीशी संवाद साधला. अ. भा. कॉंग्रेस समितीच्या संशोधन विभागाचे अध्यक्ष व राज्यसभा सदस्य प्रा. एम. व्ही. राजीव गौडा यांनी नागपुरातील समाजातील विविध घटकांच्या प्रतिनिधींशी चर्चा केली. येत्या लोकसभा निवडणुकीमध्ये कोणते मुद्दे प्रभावी होऊ शकतात. तसेच मतदारांवर प्रभाव असलेल्या घटकांचा मानस काय आहे? हे जाणून घेण्यासाठी खासदार गौडा नागपुरात आले आहेत. त्यांनी व्यापारी, उद्योजक, शेती क्षेत्रातील अभ्यासक, युवक, महिला, विचारवंतांशी चर्चा केली.

पुढील वर्षी लोकसभेची निवडणूक होणार आहे. कॉंग्रेस पक्षाची नेमकी भूमिका काय राहिली पाहिजे. निवडणूक जाहीरनाम्यात कोणत्या मुद्‌द्यांचा समावेश केला पाहिजे, यासाठी अहवाल तयार केला जाणार आहे. कॉंग्रेसच्या संशोधन विभागाचे अध्यक्ष म्हणून खासदार राजीव गौडा यांच्यावर ही जबाबदारी आहे. देशभर फिरून निवडणुकीपूर्वी दस्ताऐवज करण्याचा हा कॉंग्रेसचा पहिलाच प्रयत्न आहे. भारत मोठा देश असल्याने एका ठिकाणी बसून सर्व देशांतील लोकांच्या मनातील आकांक्षाची माहिती मिळत नाही. याचा प्रत्यय गुजरातमध्ये आला. गुजरात पॅटर्न आता सर्व देशांमध्ये राबविला जाणार आहे. महाराष्ट्र व राज्यातील प्रत्येक विभागाचे नेमके प्रश्‍न कोणते यावर फोकस केला जाणार असल्याचे खासदार गौडा यांनी पत्रकारांशी बोलताना सांगितले.

प्रा. गौडा म्हणाले की, "अच्छे दिन'चे स्वप्न दाखवून भाजप सत्तेवर आला. आश्‍वासनांची पूर्तता या सरकारला करता आली नाही. नोटाबंदी, जीएसटीचा दुष्परिणाम अर्थव्यवस्थेवर झाला आहे. जीडीपीचा दर घसरला आहे. अपेक्षित नवीन रोजगार निर्मिती झाली नाही. राफेल विमान खरेदीत घोटाळ्याचा आरोप होत आहे. मात्र, भ्रष्ट्राचारावर सरकार बोलायला तयार नसल्याचा आरोप खासदार गौडा यांनी केला.