कॉंग्रेसचे आजपासून जनआक्रोश आंदोलन

मुंबई : राज्यातील भाजप-शिवसेना युती सरकारच्या तीन वर्षेपूर्तीचे ढोल सरकारकडून वाजवले जात असताना दुसरीकडे नोटाबंदी आणि जीएसटीचा सर्वच स्तरातील लोकांना फटका बसला आहे. राज्य सरकारने कर्जमाफीची घोषणा केली; पण शेतकऱ्यांना अद्याप लाभ मिळालेला नाही. दुसरीकडे शेतमालाला भाव नसल्याने शेतकरी संकटात आहे. सरकारविषयी जनतेच्या मनातील आक्रोश जनतेत जाऊन मांडण्यासाठी काॅंग्रेसचे जनआक्रोश आंदोलन मंगळवार (ता.३१) पासून  नगर येथून सुरू होत अाहे.

माजी पंतप्रधान इंदिरा गांधीच्या पुण्यतिथीच्या निमित्ताने ३१ ऑक्टोबरपासून अहमदनगर, महाड, उस्मानाबाद, चंद्रपूर, अमरावती असे राज्यभर जनआक्रोश मेळावे घेतले जाणार अाहेत, तर ८ नोव्हेंबर हा नोटाबंदीचा दिवस काळा दिवस म्हणून कॉंग्रेसकडून साजरा करण्यात येणार आहे.

शेतकरी कर्जमाफीतील त्रुटी, वाढत्या शेतकरी आत्महत्या, हमीभावापेक्षा कमी दराने होणारी खरेदी आणि महावितरणची शेतकरी विरोधी कारवाई यावर काॅंग्रेसने राज्य सरकारवर टीका केली आहे. जनआक्रोश आंदोलनाच्या पार्श्वभूमीवर राज्यभरात ठिकठिकाणी काँग्रेस पदाधिकाऱ्यांच्या बैठका पार पडल्या असून, आंदोलन व्यापक स्वरूपात करण्याचा निर्णय घेण्यात आला.

शेतकऱ्यांच्या आत्महत्या व कीटकनाशकांच्या बळींची संख्या वाढतच आहे. याला राज्य सरकार जबाबदार असल्याचा आरोप कॉंग्रेससकडून यापूर्वीच करण्यात आला आहे. कापसला ३५०० रुपये, तर सोयाबीनला २१०० रुपये प्रतिक्विंटल भाव मिळत आहे.

धानाचीही अशीच अवस्था आहे. कापसाला ७००० तर सोयाबीनला ५००० रुपये भाव मिळावा. राज्य सरकार उत्पादन खर्चाच्या आधारे शेतमालाचे भाव काढते; परंतु शेतमालाचे भाव केंद्रीय कृषिमूल्य आयोग निश्चित करते. केंद्राचे भाव कमी असल्याने या भावातील फरकाची रक्कम राज्य सरकारने शेतकऱ्यांना द्यावी, अशी मागणी कॉंग्रेसकडून करण्यात आली आहे.

राज्य सरकार सर्व आघाड्यावर अपयशी ठरल्याने जनतेत आक्रोश आहे. काँग्रेस जनआक्रोश आंदोलनाच्या माध्यमातून जनतेच्या पाठीशी उभी आहे. नागपूर येथे होणाऱ्या विधिमंडळाच्या हिवाळी अधिवेशनावर ‘शेतकरी दिंडी’ काढण्यात येणार आहे. - अशोक चव्हाण, अध्यक्ष महाराष्ट्र प्रदेश काँग्रेस कमिटी