राजकीयीकरणामुळे सहकाराचा ऱ्हास

राजकीयीकरणामुळे सहकाराचा ऱ्हास
राजकीयीकरणामुळे सहकाराचा ऱ्हास

पुणे : देशात आठ लाखांपेक्षा अधिक सहकारी संस्था आहेत. या संस्थांशी शेतकरी आणि सर्वसामान्य नागरिक जोडला आहे. मात्र सहकार क्षेत्राचे राजकीयीकरण झाल्याने अडथळे निर्माण होऊन विकासाचा वेग मंदावला आहे. सहकाराची सेवा पारदर्शी करण्यासाठी संगणकीकरण करण्याबरोबरच कुशल मनुष्यबळाची गरज असून, सरकार यासाठी प्रयत्नशील आहे, असे प्रतिपादन केंद्रीय कृषिमंत्री राधामाेहन सिंह यांनी येथे केले. वैकुंठ मेहता राष्ट्रीय सहकार प्रशिक्षण संस्थेच्या (व्हॅमनीकॉम) वर्धापन दिनानिमित्त आयोजित कार्यक्रमात मंगळवारी (ता. १५) मंत्री सिंह बोलत होते. या वेळी रिझर्व्ह बॅंकेच्या केंद्रीय समितीचे सतीश मराठे, केंद्रीय कृषी, सहकार आणि किसान कल्याण मंत्रालयाच्या सचिव वसुधा मिश्र, संयुक्त सचिव डॉ. अभिलक्ष लिखी, व्हॅमनीकॉमचे प्राचार्य अनिल कारंजकर उपस्थित होते.  मंत्री सिंह म्हणाले, ‘‘सहकार क्षेत्राचे परिणाम ज्या वेगाने दिसायला हवे होते, तेवढ्या वेगात दिसत नाहीत. सहकाराची सेवा अधिक गतिमान होऊन, सर्वसामान्य शेतकरी आणि नागरिकांना लाभ मिळण्यासाठी या संस्थांचे संगणकीकरण करणे गरजेचे आहे. यासाठी कुशल मनुष्यबळाची गरज आहे. व्हॅमनीकॉमच्या आजच्या वर्धापन दिनाच्या निमित्ताने सहकार अधिक सक्षम करण्याचा संकल्प करू.’’   मराठे म्हणाले, ‘‘देशात १० हजारपेक्षा जास्त शेतकरी उत्पादक कंपन्या असून, त्यापैकी केवळ ३ हजार कंपन्यांची कामे व्यवस्थित आहेत. याद्वारे केवळ ८ लाख शेतकऱ्यांना फायदा हाेत आहे, मात्र ही संख्या कृषी प्रधान देशामध्ये अत्यल्प आहे. शेतमाल प्रक्रिया उद्योगांच्या अभावामुळे शेतमालाला चांगले दर मिळत नाहीत. देशात केवळ १५ टक्के शेतमालावर प्रक्रिया होत असून, यामध्ये प्रामुख्याने ऊस, कापूस आणि तेलबियांचा समावेश. विविध शेतमालावरील प्रक्रिया उद्योगांचे प्रमाण वाढविण्यासाठी सहकारी तत्त्वावरील शेतीप्रक्रिया उद्याेगांच्या प्रोत्साहनासाठी व्हॅनीकॉमने पुढाकार घेत देशातील विविध संस्थांची समन्वय साधला पाहिजे.’’  सहकारी संस्थांनी व्यावसायिकतेत येण्याची गरज असून, शेतकऱ्यांनी शेती ही उद्याेग म्हणून केली पाहिजे, असे मत वसुधा मिश्र यांनी व्यक्त केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com