नाशिकमध्ये कोथिंबिरीला मागणी वाढली

नाशिक : नाशिक बाजार समितीत गत सप्ताहात दिवाळीचा उत्साह असल्याने कोथिंबिरीला प्रति शेकडा २००० ते २७,००० व सरासरी १५,००० रुपये दर मिळाले. यावेळी आवक अवघी ८,००० जुड्यांची राहिली. पावसाच्या तडाख्याने पालेभाज्यांचे नुकसान झाले. दिवाळीत मागणी वाढली मात्र आवकच अत्यल्प झाली. परिणामी कोथिंबिरीला शेकडा २७ हजारपर्यंतचे तेजीचे दर मिळाले. या हंगामातील हे उच्चांकी दर असल्याचे बाजार समितीच्या सूत्रांनी सांगितले. गेल्या पंधरवड्यात झालेल्या परतीच्या पावसामुळे शेतमालाचे नुकसान झाले असून, त्यामुळे दिवाळीच्या कालावधीत कोथिंबिरीच्या बाजारभावाने उच्चांक गाठला. शनिवारी (ता.२१) नाशिक कृषी उत्पन्न बाजार समितीत कोथिंबीर २० हजार रुपये शेकडा दराने विक्री झाली. मात्र रविवारी (ता. २२) आजवरच्या दरांमध्ये सर्वांत उच्चांकी म्हणजे २७ हजार ५११ रुपये शेकडा जुडी असा भाव मिळाला आहे. परतीच्या पावसाने जिल्ह्यात दमदार हजेरी लावल्याने शेतातील उभे पीक नष्ट झाले आहे. पावसाचा सर्वाधिक फटका कोथिंबीरच्या उत्पादनाला बसला आहे. त्यामुळे नाशिक बाजार समितीत आवक घटली आहे. त्याचा परिणाम बाजारभावावर झाला. गुरुवारी (ता. १९) कोथिंबिरीची १८ हजार रु पये शेकडा दराने विक्री झाली होती, तर शुक्रवारी दर तेजीतच असल्याने १९ हजार रुपये शेकडा दर मिळाला होता. शनिवारी (ता.२१) कोथिंबीर बाजारभावाने चालू वर्षाचा उच्चांक मोडला. शनिवारच्या दिवशी कोथिंबीर तब्बल २० हजार रुपये शेकडा म्हणजेच २०० रुपये प्रतिजुडी दराने विक्री झाली. इतरवेळी साठ ते सत्तर हजार कोथिंबीर जुडीची आवक व्हायची तेथे आता सात ते आठ हजार जुड्यांची आवक झाली.  नाशिक बाजार समितीत दिंडोरी, कळवण तसेच सिन्नर तालुका व जवळपासच्या आदिवासी भागांतून आवक होत आहे. नाशिक कृषी उत्पन्न बाजार समितीत सिन्नर तालुक्यातील ठाणगाव पाडळी येथील शेतकरी दुर्गेश रेवगडे यांनी शिवांजली व्हेजिटेबल कंपनीत आणलेली कोथिंबीर छोटू चव्हाण या व्यापायाने २० हजार रुपये शेकडा दराने खरेदी केली.