तहसील कार्यालयासमोर कापूस, मक्का फेकून आंदोलन

सिल्लोड, जि. औरंगाबाद : गुजरातमध्ये निवडणूक डोळ्यासमोर कापूस उत्पादक शेतकऱ्यांना बोनस दिला जातो. मात्र महाराष्ट्रात शेतकऱ्यावर अन्याय केला जातोय, असे सांगत स्वाभिमानी शेतकरी संघटनेचे मुक्ताराम गव्हाणे, सुनील सनान्से यांच्या नेतृत्वात सोमवारी तहसील कार्यालयासमोर सोमवारी (ता.६) स्वाभिमानी शेतकरी संघटनेने कापूस, मक्का फेकून आंदोलन केले.

या वेळी स्वाभिमानीचे संपर्कप्रमुख सुनील सनान्से यांनी सरकारवर सडकून टीका करत कापसाला ८ हजार सोयाबीनला ६००० व मक्काला ३००० रुपये किमान भाव देण्याची मागणी केली. भाव न मिळाल्यास सरकार विरोधात तीव्र स्वरूपाचे आंदोलन करण्याचा इशाराही त्यांनी दिला.

राज्य सरकारने उत्पादन खर्चावर आधारित हमी भाव द्यावा, गुजरातच्या निवडणुका डोळ्यासमोर ठेवून तिथे कापूस उत्पादक शेतकऱ्याला बोनस दिला जातो. पण महाराष्ट्रातका नाही? असा सवाल मारोती वराडे यांनी केला.

या वेळी स्वाभिमानीचे मुक्ताराम गव्हाणे, सतीश कळम, युवराज वराडे, भगवानसिंग राजपूत यांनी सरकारविरोधात घोषणाबाजी करून सरकारचा निषेध करत कापूस व मक्का तहसील कार्यालयासमोर फेकली.

याप्रसंगी मुक्ताराम गव्हाणे यांनी सरकारने जबाबदारीचे भान ठेवावे, सक्तीने वीजवसुली बंद करून खंडित केलेला वीजपुरवठा सुरळीत करावा अशी मागणी केली. तसेच मागण्याचे निवेदन तहसीलदार यांच्या मार्फत मुख्यमंत्री देवेंद्र फडणवीस यांना पाठवण्यात आले. या वेळी स्वाभिमानीचे पदाधिकारी व शेतकरी उपस्थित होते.