महागाव, जि. यवतमाळ : जिल्ह्यात तसेच महागाव तालुक्‍यात कपाशीवर बोंड अळीचा प्रादुर्भाव झाला, यामुळे झालेल्या नुकसानीचे सर्वेक्षण करून मदतीसाठी पाठपुरावा करण्याचे आश्‍वासन आमदार राजेंद्र नजरधने यांनी मंगळवारी (ता.८) दिले.
महागाव तालुक्‍यातील मुडाणा येथील अशोक येनकर यांच्या शेताला भेट देत त्यांनी पिकाची पाहणी केली. महागाव तालुक्‍यात सर्वदूर कपाशीवर कीड-रोगाचा प्रादुर्भाव झाला आहे. बीटी कपाशीवर बोंड अळीचा प्रादुर्भाव होणार नाही, असा दावा केला जात होता. परंतु त्यावरच या वेळी गुलाबी बोंड अळीचा सर्वाधिक प्रादुर्भाव झाला. अशोक बापूराव येनकर यांनी पाच एकरावर बीजी-२ तंत्रज्ञानाचा अंतर्भाव असलेले कपाशी वाण लावले.
एकरी २० हजार रुपयांचा आजवर खर्च झाला. परंतु उत्पादकता मिळाली अवघी एकरी एक क्‍विंटलची. यातून उत्पादकता खर्चाची भरपाई होणे शक्‍य नसल्याने त्यांची चिंता वाढली होती. आमदार नजरधने यांनी त्यांच्या शेताला भेट दिली. या वेळी उपविभागीय कृषी अधिकारी प्रशांत नाईक, महागाव तालुका कृषी अधिकारी राजकुमार रणवीर उपस्थित होते.
