खानदेशात विजेच्या समस्येमुळे कापसाला फटका

जळगाव : जिल्ह्यात वादळी पावसाने दणका दिल्याने अनेक भागांत शेतपंपांना वीजपुरवठा करणारे रोहित्र, तारा यात बिघाड झाले आहेत. परिणामी, पूर्वहंगामी कापसासह केळी पिकाचे हवे तसे सिंचन करता न आल्याने या पिकांना फटका बसला आहे.

जिल्ह्यात पूर्वहंगामी कापूस लागवड २२ मेपासून सुरू झाली. नंतर १ जूनपासून वादळी पाऊस सुरू झाला. जिल्हाभर वादळी पावसाने धुमाकूळ घातला. त्यात केळीचे नुकसान झाले. यातच शेतपंपांना वीजपुरवठा करणाऱ्या यंत्रणांमध्ये बिघाड झाले. शेतकरी वीज कंपनीकडे दुरुस्तीसंबंधी गेले, तर त्यांच्याकडे बिलांचे पैसे मागितले गेले. वादळी पाऊस १ जून ते ६ जूनपर्यंत सुरूच होता. शेतपंप सुरूच झाले नाहीत. दुपारी ऊन पडायचे. सिंचन झाले नाही. त्यात जूनमध्ये लागवड केलेल्या कापसाचे कोवळे कोंब करपले.

अनेक ठिकाणी शेतकऱ्यांना पिकात नांग्या भरायचे काम करावे लागत आहे. दोन एकरांत एक कापूस बियाण्याचे पाकीट नांग्या भरण्यासाठी लागत आहे. त्यासाठी पाकिटावरील ७४० रुपये व मजुरीसाठी २०० रुपये, असा मिळून सुमारे ९५० रुपये खर्च येत आहे. मागील दोन दिवसांपासून सतत उष्णता आहे. ऊन तापत आहे. सिंचन करण्यासंबंधी शेतकरी शेतात जातात, पण वीजपुरवठा व्यवस्थित नसतो. जळगाव, चोपडा, यावल, चाळीसगाव, पाचोरा, भडगाव आदी भागांत वीज कंपनीकडून दुरुस्तीची कामे गतीने झालेली नाहीत.

तुटलेल्या तारांची दुरुस्ती, तारांच्या आड येणाऱ्या वृक्षांच्या फांद्या तोडणे, रोहित्राची किरकोळ दुरुस्ती, वाकलेले खांब सरळ करणे आदी कामांसाठी शेतकऱ्यांकडून वीज कंपनीचे अधिकारी पैसे मागत असल्याच्या तक्रारी आहेत. याबाबत लोकप्रतिनिधींकडे तक्रारी केल्यास तेदेखील दखल घेत नाही. वीज कंपनीचे अधिकारी आपल्या नियुक्तीच्या ठिकाणी उपस्थित नसतात. दुपारी ते कुठेही सापडत नाहीत. अशा स्थितीत समस्या कशा मार्गी लावायच्या, असा प्रश्‍न शेतकऱ्यांसमोर आहे. हा प्रश्‍न आणखी दोन दिवस तसाच रा.िहला, तर केळी व कापसाचे अतोनात नुकसान होईल, असे शेतकऱ्यांचे म्हणणे आहे.

वीज कंपनीने शेतपंपांचा वीजपुरवठा व्यवस्थित करावा. अन्यथा त्यांच्या विरोधात आंदोलन केले जाईल. शेतकऱ्यांच्या संयमाची परीक्षा त्यांनी घेऊ नये. शेतकऱ्यांचे कोट्यवधींचे नुकसान वीज कंपनीमुळे होत आहे. - कडूअप्पा पाटील, शेतकरी, किनगाव (जि. जळगाव)