कपाशीच्या नुकसानभरपाईसाठी बियाणे पिशवीचा आग्रह धरू नये

परभणी : गुलाबी बोंड अळीच्या प्रादुर्भावाने तसेच बियाणे गुणवत्तेअभावी झालेल्या पिकांच्या नुकसानीची पाहणी करून पंचनामे करावेत. बियाणे खरेदीच्या पावत्यांच्या आधारे शेतकऱ्यांना नुकसानभरपाई देण्यात यावी. त्यासाठी बियाण्यांच्या पिशवीचा शेतकऱ्यांकडे आग्रह करू नये, असे निर्देश पालकमंत्री गुलाबराव पाटील यांनी कृषी विभागाच्या अधिकाऱ्यांना शुक्रवारी (ता. २४) दिले.

शुक्रवारी (ता. २४) दुपारी परभणीचे पालकमंत्री गुलाबराव पाटील यांच्या अध्यक्षतेखाली जिल्हा नियोजन समितीची बैठक झाली. या वेळी श्री. पाटील बोलत होते. जिल्हा परिषद अध्यक्षा उज्वला राठोड, खासदार संजय जाधव, आमदार बाबाजानी दुर्राणी, आमदार डॉ. राहुल पाटील, आमदार विजय भांबळे, जिल्हाधिकारी पी. शिवशंकर, महानगरपालिका आयुक्त राहुल रेखावार, मुख्य कार्यकारी अधिकारी प्रताप सवडे यांची तसेच नवनियुक्त सदस्य उपस्थित होते.

श्री. पाटील पुढे म्हणाले, की शेतकऱ्यांच्या पिकाच्या नुकसानीची शक्यता लक्षात घेऊन महावितरणने प्राधान्याने रोहित्र बदलण्याची कार्यवाही करावी, असे निर्देश श्री. पाटील यांनी दिले.