भाताच्या खोडकिडी ल्यूर पाकिटात कापसावरील गुलाबी बोंड अळीचा ल्यूर

चंद्रपूर ः भातावरील खोडकिडीचे पतंग आकर्षित व्हावे यासाठी ल्यूरच्या (नर पतंगांना आकर्षित करणारे कामगंध रसायन) पाकिटावर स्किटर लावत बोंड अळी नियंत्रणाकामी त्यांचा पुरवठा करण्यात आला. थेट मुदतबाह्य ल्यूर पुरविण्यात आल्याचा धक्‍कादायक खुलासाही चंद्रपूर जिल्ह्यात उघडकीस आला आहे. या वर्षी कापूस पिकावर बोंड अळीचा प्रादुर्भाव झाल्यामुळे त्याच्या नियंत्रणासाठीच्या उपाययोजनांवर कृषी विभागाने भर दिला आहे. परंतू कृषी विभागाच्या या प्रयत्नांना खीळ घालण्याचे काम कृषी मंत्रालयाच्या अखत्यारित असलेल्या कृषी औद्योगीक विकास मंडळाकडून होत असल्याची धक्‍कादायक बाब समोर आली आहे. चंद्रपूर जिल्ह्यात १ लाख ८४ हजार २५५ हेक्‍टर क्षेत्रावर कापसाची लागवड होते. तेलंगणा सीमेलगत असलेल्या या भागात गेल्या हंगामात सर्वाधिक क्षेत्रावर प्रतिबंधित एच.टी. (हर्बीसाईड टॉलरंट) बियाणे लागवड झाली होती, असे सांगण्यात येते. या वर्षी पुन्हा गुलाबी बोंड अळीचा प्रादुर्भाव होऊ नये याकरीता कृषी विभागाने राज्यात सुरू असलेल्या प्रयत्नांच्या धर्तीवर चंद्रपूर जिल्ह्यातदेखील उपाययोजना राबविणे सुुरू केले. परंतू या प्रयत्नांना पहिल्याच टप्प्यात खीळ घालण्यात आल्याचा आरोप शेतकरी करीत आहेत. दरम्यान, लूरचा पुरवठा करणाऱ्या कंपनीच्या अधिकाऱ्यांशी संपर्क साधला असता त्यांनी प्रतिक्रिया देण्यास नकार दिला.  पाकिटावर मुदत २०११ मध्ये संपत असल्याचा उल्लेख  महाराष्ट्र कृषी औद्योगिक विकास मंडळामार्फत (एमएआयडीसी) चंद्रपूर जिल्ह्यात फेरोमोन ट्रॅप्सचा ७० रुपये दराने पुरवठा करण्यात आला आहे. यात वापरण्यात आलेल्या ल्यूरच्या पाकिटांवर स्टिकर लावण्यात आले आहे. हे स्टिकर काढल्यानंतर त्याखालील मूळ पाकिटावर भात खोडकिडीच्या पतंगासाठीचे लूर असल्याचा उल्लेख आहे. मागील बाजूस देखील स्टिकर लावण्यात आले असून, त्यावर उत्पादन तारीख २०१० आणि मुदत संपण्याचा कालावधी २०११ असा उल्लेख आहे.