कॉटन पिकर बदलवणार देशाच्या कपाशीचे लागवडतंत्र

काॅटन पीकर
काॅटन पीकर

पुणे: मजुरांअभावी कापूस वेचणीसाठी देशाच्या कापूस शेतीत तयार झालेल्या सर्वात मोठ्या समस्येवर शक्तिशाली ''कॉटन पिकर'' उपाय शोधण्यात आला आहे. मात्र, या कॉटन पिकरला शेतात हवे तसे काम करता येण्यासाठी थेट कापूस लागवड तंत्रातच बदल घडवून आणण्यासाठी कृषी अवजार कंपन्या चिकाटीने प्रयत्न करीत आहेत.  देशात अंदाजे १०० लाख हेक्टरपेक्षा जास्त कापूस पेरा केला जात असून, त्यातील कापूस वेचणीसाठी स्थानिक मजुरांचा वापर केला जातो. मात्र, गेल्या दोन वर्षांपासून मजुरांची टंचाई आणि मजुरीचे वाढते दर यामुळे कापूस उत्पादक शेतकरी हैराण झालेले आहेत. त्यासाठी ऊसशेतीत आलेल्या ''केन हार्वेस्टर''प्रमाणेच कपाशीत ''कॉटन पिकर'' आणण्याचा कंपन्यांचा प्रयत्न आहे.  कापूस उत्पादक पट्टयांमधून दर हंगामात सरासरी ३३० लाख ते ३५० लाख गाठींपर्यंत कापूस वेचणी केली जाते.  मजुरांअभावी कापूस शेतीत मोठी समस्या तयार झालेली आहे. यामुळे गहू-धानात वापरल्या जाणाऱ्या हार्वेस्टरप्रमाणेच मजुरांऐवजी थेट यंत्राच्या सहायाने पर्याय पुढे येण्याची शक्यता आहे. पहिल्या टप्प्यात ७५, ९०, ११० अश्वशक्तीच्या ट्रॅक्टरला या यंत्राची जोडणी केली जाणार आहे.  ''कापूस वेचणी करण्याकडे कृषीअवजार उद्योगाला यंत्र निर्मितीसाठी वाव आहे. त्यासाठी एका आघाडीच्या विदेशी कंपनीने कापूस वेचणी करणारे कॉटन पिकरची निर्मिती केली आहे. मात्र, मुख्य मुद्दा आहे तो भारतीय कापूस लागवड तंत्राचा. त्यामुळे या कंपनीने शेतकऱ्यांना केवळ कापूस वेचणीचे कॉटन पिकर नव्हे, तर वेगळे वाण, त्यासाठी लागणारी पीकसंरक्षण साधने आणि पानगळीचे रसायनदेखील कसे पुरवता येईल यासाठी आराखडे तयार केले आहेत,’’ अशी माहिती एका अभ्यासकाने दिली.   कॉटन पिकर यंत्राला वेचणी सुलभपणे करण्यासाठी एकाच वेळी बोंड असलेली झाडे हवी आहेत. भारतात सध्या अस्तित्वात असलेल्या वाणाला एकाच वेळी बोंड येत नाहीत. याशिवाय दुसरा खोडवा म्हणजे फरदडचीदेखील वेचणी करावी लागते. ही समस्या नव्या वाणातून सोडविली जाणार आहे. 

कपाशीत पानगळीसाठी रसायनांच्या चाचण्या भारतात या नव्या वाणाला कपाशीची बोंडे एकसारखी व एकाच वेळी आल्यानंतर पुढे यंत्राद्वारे कापणीपूर्वी पानगळ करण्यासाठी रसायनांच्या चाचण्यादेखील घेतल्या जात आहेत. कॉटन पिकर यंत्रात कपाशीची पाने न जाता फक्त बोंडे जावीत, असा प्रयत्न संशोधकांचा चालू आहे. अर्थात, संशोधनाचा तपशील अजून कंपनीने जाहीर केलेला नाही. या नव्या कॉटन पिकरची किंमत २५ ते ३० लाख रुपयांच्या आसपास राहण्याची शक्यता आहे.    

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com