जळगाव ः जिल्ह्यात कापूस उत्पादनात घटीचे संकेत मिळताच दरात थोडी सुधारणा झाली असून चोपडा, जळगाव, धरणगाव भागात क्विंटलमागे १५० रुपये सुधारणा झाल्याची माहिती आहे. सध्या दर ४४०० रुपये प्रतिक्विंटलपर्यंत पोचले आहेत.
काही भागांत पहिल्या तीन वेचणीच्या कापसाला ४४५० रुपये प्रतिक्विंटलपर्यंत दर आहेत, तर कमी दर्जाच्या कापसाला क्विंटलमागे ४२०० ते ४३०० रुपये प्रतिक्विंटलचा दर असल्याची माहिती आहे.
महिनाभरापासून कापसाचे दर दबावात आहेत. त्यातच सध्या जिनिंग व इतर खासगी खरेदीदारांना हवा तेवढा कापूस मिळत नसल्याचे चित्र आहे. त्यातच गुजरातमधील कडी येथे कापसाचे दर स्थिरावले असून, ते ४७०० रुपये प्रतिक्विंटलपर्यंत पोचले आहे.
खानदेशात गुजरातमधील जिनिंग व्यावसायिक मध्यस्थांकडून कापूस खरेदी करून घेतात. जिनिंगना निम्मेच कापूस प्रक्रियेसाठी रोज उपलब्ध होत आहे. त्या निम्मेच क्षमतेने कार्यरत आहेत. त्यामुळे कापसाचा दर्जा लक्षात घेऊन अधिक दर खरेदीदार देत असल्याची माहिती मिळाली.
शिरपूरलगत (जि. धुळे) मध्य प्रदेशातील सेंधवा येथेही दर स्थिर आहेत, परंतु तेथेही ४४५० पेक्षा अधिक दर नसल्याची माहिती मिळाली. शिरपूर, धुळे तालुक्यातील काही कापूस उत्पादक जादा दरांच्या अपेक्षेने सेंधवा येथे कापूस विक्रीसाठी नेत असल्याची माहिती मिळाली.