कापूस पणन महासंघाची आजपासून कापूसखरेदी

नागपूर ः राज्यात २५ ऑक्टोबरच्या मुहूर्तावर कापूसखरेदी सुरू करण्याच्या निर्णयावर शिक्‍कामोर्तब झाले आहे. मात्र सीसीआय आणि पणन महासंघाची किती केंद्र असतील यावर मंगळवार (ता.२४) दुपारपर्यंत सहमती झाली नसल्याने याविषयी बोलण्यास पणन महासंघाकडून असमर्थता व्यक्‍त करण्यात आली.  राज्यात या वर्षी ऑनलाइन नोंदणी केलेल्या शेतकऱ्यांचाच कापूस खरेदी केला जाणार आहे. एेनवेळी शेतकऱ्यांना बोनस किंवा वाढीव रक्‍कम द्यावयाची झाल्यास ऑनलाइन प्रक्रियेच्या माध्यमातून शेतकरी शोधणे सोपी होणार असल्याने हा पर्याय निवडण्यात आल्याचे सूत्र सांगतात. पहिल्या टप्प्यात पणन महासंघ सुमारे ६० केंद्रे सुरू करेल; तर सीसीआयची नोव्हेंबर महिन्यात ७५ केंद्रे राहतील.  परतीच्या पावसाने बोंड भिजली परिणामी ओलाच कापूस बाजारात येण्याच्या शक्‍यतेने सीसीआय आपली केंद्र नोव्हेंबरमध्ये उघडणार आहे. मात्र राज्य सरकारवर कापूस उत्पादकांचा दबाव वाढल्याने सरकारने हस्तक्षेप करीत पणन महासंघाला केंद्र उघडण्यास सांगितले. त्यानुसार २५ ऑक्‍टोंबरपासून पणनची खरेदी होईल. मात्र मंगळवारी (ता.२४) दुपारपर्यंतच्या बैठकीत केंद्रसंख्येबाबत सहमती झाली नाही.