अमरावतीत बोंडअळीमुळे कपाशीत ५१ टक्क्यांची घट

अमरावती ः या वर्षीच्या हंगामात जिल्ह्यात एक लाख ३ हजार ८०० हेक्‍टरवरील कपाशीवर बोंडअळीचा प्रादुर्भाव झाला. यामुळे उत्पादनात ५१ टक्‍क्‍यांची घट झाल्याचा प्राथमिक अहवाल कृषी विभागाकडून जिल्हाधिकाऱ्यांना सादर करण्यात आला. त्यानंतर हा अहवाल शासनाला सादर करण्यात आला आहे. बियाणे कंपन्यांकडून भरपाई व एनडीआरएफची मदत मिळावी, यासाठी गुलाबी बोंडअळीने बाधित क्षेत्राचे सर्वेक्षण व पंचनाम्याचे आदेश जिल्हाधिकाऱ्यांनी सर्व यंत्रणांना दिले होते. त्यानंतर दोन दिवसांत अहवाल मागितला होता. मात्र प्राथमिक अहवालापेक्षा प्रत्यक्षात नुकसान जास्त असल्याचे शेतकरी सांगत आहेत. पाच डिसेंबरच्या मंत्रिमंडळाच्या निर्णयावर कपाशीवरील गुलाबी बोंडअळी व तुडतुड्यामुळे बाधित झालेल्या क्षेत्राचे पंचनामे करण्याचे आदेश देण्यात आले होते. त्याआधारेच पंचनामे करून प्राथमिक अहवाल शासनाला सादर करण्यात आला.  रुईची उत्पादकता होणार कमी बोंडअळीमुळे हेक्‍टरी ८४९ किलो रुईचे उत्पादन कमी होणार आहे. यामध्ये भातकुली तालुक्‍यात सर्वाधिक १,०५६ किलो, अमरावती ८४३, चांदूर रेल्वे ८३५, धामनगाव रेल्वे ७२२, नांदगाव खंडेश्‍वर ८४४, मोर्शी ८८१, वरुड ८१०, चांदूरबाजार ९४१, तिवसा ९३७, अचलपूर ९५०, अंजनगावसुर्जी ९२१, दर्यापूर ९१४, धारणी ४७२, चिखलदरा तालुक्‍यात ५२५ किलो रुईच्या उत्पादनात घट होईल, असा प्राथमिक अंदाज आहे.